BEKMUHAMEDOV ShAVKAT MUHAMEDJANULY

Bekmuhamedov Shavkat Muhamedjanuly (1892-1958) - memleket jáne qoǵam qaıratkeri. Bókeı ordasynda (qazirgi Batys Qazaqstan oblysy) dúnıege kelgen.

1903-1912 jyldary Astrahan erler gımnazııasynda, 1912-1917 jyldary Qazan ýnıversıtetiniń zań fakýltetinde oqyǵan. Qazan ýnıversıtetinde oqyp júrgen kezinde stýdentter qozǵalysyna qatysqany úshin oqýdan shyǵarylyp, qaıta alynǵan. Bekmuhamedov Shavkat 1916-1917 jyldary tyl jumysyna alynǵan qazaq jigitterine kómektesý maqsatynda qazaq zııalylarymen birge Belarýste boldy.

1917 jyly 2-6 sáýir aralyǵynda Bekmuhamedov Shavkat Orynbor qalasynda Oral, Aqmola, Semeı, Syrdarııa oblystarynyń jáne Bókeı ordasynyń ókilderi qatysqan Torǵaı oblysy qazaqtarynyń sezinde tóralqa hatshysy, al 1917 jyly 21 sáýirinde ótken Bókeı ordasynyń bolystary sezi tóraǵasynyń orynbasary bolǵan.

Bókeı ordasynyń alǵashqy jer komıssary jáne gýbernııalyq jumysshy-sharýa, qyzyl-áskerler Keńesiniń tóraǵasy. 1918 jyly áskerı komıssardyń orynbasary qyzmetin atqarǵan. 1919 jyly qarashadan Qazaq revolıýtsııalyq komıtetiniń músheligine, 1921 jyly qyrkúıekte ІІ Jalpyqazaqtyq keńester sezinde Ádilet halyq komıssarıaty quramyna saılanǵan.

Bekmuhamedov Shavkat Qazaq avtonomııasynyń alǵashqy zań aktilerin daıyndaýǵa kóp eńbek sińirgen. Qazaq AKSR-i Konstıtýtsııasyn ázirleý komıssııasynyń múshesi boldy. Keıinnen túrli memlekettik keńes jumystaryn atqaryp, joǵarǵy oqý oryndarynda sabaq bergen.

Derek kózi:

Qazaqstan ulttyq entsıklopedııasy, 2 tom.