Beeline ınternet baǵasyn qoldan kótergen – agenttik
ASTANA. KAZINFORM – Básekelestikti qorǵaý jáne damytý agenttiginiń Astana qalasy boıynsha departamenti Beeline uıaly baılanys operatory qyzmetinde birqatar zańbuzýdy anyqtady.

- Básekelestikti qorǵaý salasyndaǵy zańnamany buzý faktileri boıynsha taldaý júrgizildi. Onyń nátıjesinde «KaR-Tel» JShS (Beeline) tarapynan úı ınterneti qyzmetinde ústem jaǵdaıdy teris paıdalaný belgileri anyqtaldy, bul tutynýshylardyń zańdy quqyǵynyń shektelýine ákeldi. Taldaý nátıjeleri kórsetkendeı, Beeline tutynýshylarǵa úı ınternetiniń jyldamdyǵyn tańdaý múmkindigin shektep, 100 Mbıt/s-tan joǵary jyldamdyqtaǵy ınternetti usynǵan. Bul óz kezeginde baǵany jasandy túrde qymbattaýyna jáne tutynýshylar quqyǵynyń buzylýyna alyp keldi, - delingen habarlamada.
Beeline kompanııasynyń resmı saıtynda jarııalanǵan aqparatqa sáıkes, 300 Mbıt/s-qa deıingi jyldamdyqtaǵy ınternet tek GPON tehnologııasy bar úılerde ǵana qoljetimdi. Al basqa úılerde eń joǵary jyldamdyq 100 Mbıt/s-ty quraıdy, biraq tarıf baǵasy barlyq abonent úshin birdeı.
- 2024 jyly 19 qarashada Beeline kompanııasyna básekelestikti qorǵaý salasyndaǵy zańnama talaptaryn buzýdy joıý jóninde habarlama jiberildi, - deıdi elordalyq departamentten.
Kompanııaǵa tutynýshylardyń tarıfti tańdaýdaǵy quqyǵyn qamtamasyz etý boıynsha kelesi sharalardy qabyldaý tapsyryldy:
- eger tutynýshy joǵary jyldamdyqtaǵy ınternetti paıdalanǵysy kelmese, jyldamdyǵy 100 Mbıt/s -tan aspaıtyn ınternetpen qamtý;
- 100 s/Mbıt-tan aspaıtyn ınternetke qosý qyzmetin qosymsha aqysyz júzege asyrý.
- Qazir usynymdar tolyq oryndaldy. 2025 jylǵy 15 qańtardan bastap tutynýshylarǵa 100 Mbıt/s-qa deıingi tarıftik josparlar usynyla bastady jáne olardyń baǵasy 500 teńgege arzandady, - delingen aqparatta.
Buǵan deıin elimizdegi uıaly baılanys operatorlarynyń tarıfti negizsiz kóterý áreketteri qaralyp jatqany týraly habarlaǵan edik.
Básekelestikti qorǵaý jáne damytý agenttigi uıaly baılanys operatorlardyń tarıf baǵasyn negizsiz kóterý faktilerin anyqtaǵan jaǵdaıda tergeý rásimi taǵaıyndalady.