Baıanaýylda Qanysh Sátbaevtyń 125 jyldyq mereıtoıy atalyp ótedi
PAVLODAR. KAZINFORM – 16-17 tamyz kúnderi Pavlodar oblysynda geolog-ǵalym, akademık, Qaz KSR Ǵylym akademııasynyń tuńǵysh prezıdenti Qanysh Imantaıuly Sátbaevtyń 125 jyldyq mereıtoıyna arnalǵan saltanatty is-sharalar ótkiziledi.
16 tamyzda Pavlodar qalasy, Estaı atyndaǵy mádenıet saraıynda «Akademık Q.I.Sátbaevtyń murasy: Danyshpannyń fenomeni jáne Qazaqstan ǵylymynyń damýyna qosqan úlesi»atty respýblıkalyq ǵylymı-praktıkalyq konferentsııa uıymdastyrylady. Konferentsııa sheńberinde geologııa baǵyty boıynsha konkýrstyń jeńimpazdary 7 jas ǵalymǵa taǵaıyndalǵan granttar tabystalady.
Odan soń shaqyrylǵan qonaqtar Baıanaýyl aýdanyna baryp, Musa Shorman aýyly Q.Sátbaevtiń týǵan jerine zııarat etýi, sondaı-aq Leker aýylynyń mańynda Júsipbek Aımaýytov ashqan «Mádenı kindik» aýylynyń ornyna belgitas qoıý josparlanǵan.
Bul kúni Baıanaýyl aýdany ortalyǵynda S.Toraıǵyrov atyndaǵy aýdandyq mádenıet úıinde Halyqaralyq aqyndar aıtysy uıymdastyrylady.
17 tamyz kúni Baıanaýylda ǵalym A.Qudabaevtyń Álkeı Marǵulan týraly entsıklopedııasynyń jáne qalamger S.Baıbosynnyń Júsipbek Aımaýytovqa arnalǵan kitabynyń tusaýkeseri, A.Qudabaevtyń «Suńǵyla» atty estelikter jınaǵynyń jáne aqyn A.Shuǵataevtyń «QANYSHAME» kitabynyń tanystyrylymdary ótedi.
Baıanaýylda bul kúni akademık Q.Sátbaev memorıaldyq mýzeıiniń aldynda Q.Sátbaevtyń bıýstine gúl shoqtaryn qoıý rásimi uıymdastyrylady.
Odan ári is-sharalar Moıyldy shatqalynda ornalasqan etnoaýylda jalǵasyn tabady. Baǵdarlama boıynsha basty sahnada Halyqaralyq aqyndar aıtysynyń ekinshi kúni, Ortaazııalyq Halyqaralyq qolónershileriniń jármeńkesi, pavlodarlyq sýretshilerdiń kórmesi, Ulttyq sport túrlerinen jarys, Isa Baızaqov atyndaǵy oblystyq fılarmonııa ártisteriniń jáne oblys ónerpazdarynyń kontserti uıymdastyrylady. Etnoaýylda LED ekranda «QANYSh» fılmi kórsetiledi.
Eske sala keteıik, Qanyshtyń ákesi Imantaı Sátbaıulyna «Halyq sýdıasy» tósbelgisi ne úshin berilgeni týraly jazǵanbyz.
Al Pavlodarda Qanysh Sátbaev syılaǵan jazý mashınkasy saqtalyp tur.
