Batys Qazaqstanda taǵy da qurǵaq shóp órtendi

ORAL. QazAqparat – Batys Qazaqstan oblysynda qurǵaq shóp otqa orandy, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkenindeı, oqıǵa 3 shilde kúni Bórli aýdany Aqbulaq aýyldyq okrýgi aýmaǵynda boldy.

«Shyńǵyrlaý aýdanymen shekaralas aýmaqta qurǵaq shóp jandy. BQO TJ departamenti, jergilikti atqarýshy organdar jáne memlekettik emes órtke qarsy qyzmet kúshimen (63 adam, 16 tehnıka, 1 spýtnıktik telefon) Bórli jáne Shyńǵyrlaý aýdanynan eki jedel top qurylyp, eki jaqtan órt sóndirý jumystary júrgizilýde. Shamamen 40 gektardan astam alqapta qurǵaq shóp jandy. TJ departamenti bazasynda kúsh-quraldardy úılestiretin jedel shtab qurylyp, jumystanýda. «Tilsiz jaý» saǵat 21.21-de oqshaýlandy. Qazirgi ýaqytta dala órtiniń basym bóligi sóndirildi, eldi mekenderge qaýip tónip turǵan joq. Órttiń taralýy baıqalmaıdy», dep habarlady vedomstvodan.

Eske sala keteıik, budan buryn Oral qalasy mańynda qurǵaq shóp pen butalar órtenip jatyrǵanyn jazǵan bolatynbyz.