Batys Qazaqstanda taǵy bir oqýshy sýǵa ketti
ORAL. Shildeniń 8-i. QazAqparat /Eljan Eraly/ - Shildeniń 7-sinde Jaıyq ózenine shomylý kezinde 2001 jylǵy Elsavar Seıfalov sýǵa ketti, dep habarlaıdy QazAqparat tilshisi oblystyq tótenshe jaǵdaılar departamentinen túsken málimetke silteme jasap.
Oral qalasynda turǵan tórtinshi synyp oqýshysy sýdan qutqarýshylar kúzetpeıtin jerden sýǵa túsken.
Bıyl óńirde barlyǵy 22 adam sýǵa ketse, sonyń ishinde balalar da az emes. Budan buryn jaz basynda Jańaqalanyń Másteksaıynda eki bala, Qaztalovta bir oqýshy tilsiz jaýdyń qurbany bolsa, maýsymnyń 29-ynda Býdarın kanalynda on bir jasar qyz bala sýǵa ketken edi.
Oral qalasyndaǵy negizgi jaǵajaılar men Shalqar kólin baqylaýǵa tótenshe jaǵdaılar departamenti qyzmetkerlerimen qatar polıtseı jasaqtary da belsene qatysýda.
