«Batyr arýlar» baıqaýynyń jeńimpazdary belgili boldy

ASTANA. QazAqparat - Áıel áskerı qyzmetshiler arasyndaǵy ekinshi «Batyr arýlar» respýblıkalyq baıqaýynyń jeńimpazdary belgili boldy, dep habarlady QR Qorǵanys mınıstrliginiń baspasóz qyzmeti.

80-nen asa qatysýshy úzdik áskerı qyzmetshi ataǵyna  baq synasty. Ashyq daýys berý qorytyndysy boıynsha QR Qarýly Kúshteriniń 12 úzdik ókili anyqtaldy. 

Daýys berý sáýirdiń 1-i men mamyrdyń 31-i aralyǵynda Qorǵanys mınıstrliginiń saıtynda júrgizildi. Bul ýaqyt ishinde konkýrsanttarǵa 253 875 rekordtyq daýys sany berildi.

«Resmı marapattaýǵa deıin baıqaý fınalısteri jaýyngerlik aıla-tásilder men dalalyq jaǵdaıda jattyǵýlardy oryndap, dene jáne jaýyngerlik daıarlyqtaryn pash etedi. Olarǵa udaıy jaýyngerlik ázirlikte bolatyndaryn, júktelgen tapsyrmalardy sátti oryndaıtyndaryn dáleldeý qajet bolady», - dep habarlady vedomstvonyń baspasóz qyzmeti.

Sondaı-aq kásibı stılıster baıqaý jeńimpazdarynyń kórkine kórik berip, bet-álpetterin ajarlandyra túspek. Jáne mamandandyrylǵan kúntizbege arnalǵan fotosessııa kútip tur. Bul kúnparaqtyń betterin «Batyr arýlar» baıqaýynyń jeńimpazdary ajarlandyra túsedi.