Batys Qazaqstanda astyq qanshalyqty jınaldy

ORAL. KAZINFORM — Batys Qazaqstan oblysynda barlyq egis alqaby 607 myń gektar bolsa, sonyń 309,6 myńy – dándi daqyldar, 98,1 myńy – maıly daqyldar, 195,5 myńy – mal azyqtyq daqyldar, 3,9 myńy – kókónis-baqsha daqyldary.

BQO aýyl sharýashylyǵy basqarmasy basshysynyń orynbasary Berik Sıtqazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 63 myń gektardan (20 paıyz) dándi daqyldar orylyp, ortasha eseppen gektaryna 11,5 tsentner ónimdilikpen 72 myń tonna astyq jınaldy. 

Berik Maratulynyń sózine qaraǵanda, egin oraǵy odan ári jalǵasýda.

«Kúzgi dala jumystaryna jáne mal azyǵyn daıyndaýǵa barlyǵy 11 myń tonna jeńildetilgen dızel otyny bólindi. Sonyń 8,5 myń tonnasy kúzgi dala jumystaryna baǵyttalǵan. Sondaı-aq kóktemgi dala jumystarynan qalǵan 2,7 myń tonna dızel otyny bar. Jetkizýshi operator bolyp «Neftek» JShS belgilendi. Kúni búginge deıin aýyl sharýashylyǵy qurylymdarymen 1993 tonnaǵa kelisim-shart jasalyp, 869 tonna (33 paıyz) dızel otyny satyp alyndy», deıdi B.Sıtqazıev.

Onyń aıtýynsha, ósimdik sharýashylyǵyndaǵy sýbsıdııalaý baǵdarlamalaryna 1,4 mlrd teńge qarastyryldy. Jyl basynan beri osy baǵdarlamalar boıynsha sharýalarǵa 671 mln teńge sýbsıdııa tólendi.

«Sonymen qatar Batys Qazaqstan oblysyna «Agrarlyq nesıe korporatsııasy» AQ arqyly «Keń dala» baǵdarlamasy boıynsha kóktemgi dala jumystaryn qarjylandyrýǵa sharýalarǵa 5 paıyzben 2,4 mlrd teńge berilip, tolyq ıgerildi. Odan keıin «Keń dala-2» baǵdarlamasy arqyly egis jáne egin orý jumystaryn 5 paıyzben qarjylandyrý úshin 7,0 mlrd teńge bólindi. Búginde 2,04 mlrd teńge sharýalardyń qolyna tıdi, 0,13 mlrd teńgege ótinimder qaralýda. Odan bólek agroónerkásip kesheniniń egis jáne egin orý jumystaryn qarjylandyrý úshin 5 mlrd teńge «Aqjaiyq» áleýmettik-kásipkerlik korporatsııasyna berildi», dedi B.Sıtqazıev.

Eske sala keteıik, budan buryn BQO-da sý tasqynynan egistikke kelgen zalal 261 mln teńgeden asqanyn jazǵan edik.