Batys Qazaqstanda 19,2 myń bala dıspanserlik esepte tur
ORAL. KAZINFORM — Batys Qazaqstan oblysynda 18 jasqa deıingi 214,4 myńnan astam bala bar.
BQO densaýlyq saqtaý basqarmasy basshysynyń orynbasary Aınash Ǵubaıdýllınanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 19,2 myń bala dıspanserlik esepte tur.
Aınash Jubanyshqyzynyń sózine qaraǵanda, oblys boıynsha múmkindigi shekteýli balalar sany 3 742 bolsa, sonyń 3 554-i nemese 95 paıyzy saýyqtyrýdan ótkizildi.
— Memleket basshysynyń «Qazaqstan balalary» birtutas baǵdarlamasyn ázirleý jónindegi bastamasyna sáıkes bıyl Halyqaralyq balalardy qorǵaý kúni aıasynda 26 mamyr — «Dáriger — balalardyń janashyry» atty taqyryptyq kún bolyp bekitildi. Osyǵan oraı óńirde is-sharalar josparyna sáıkes medıtsınalyq uıymdar men emhanalarda dárigerler balalardy tekserýden ótkizip, tegin keńes berip jatyr, — deıdi Aınash Ǵubaıdýllına.
Onyń aıtýynsha, oblysta jyl saıyn 12 myńǵa jýyq áıel júktiligi boıynsha esepke alynyp, 11 myńnan astam sábı dúnıege keledi.
Densaýlyq saqtaý mınıstrliginiń «Qazaqstan Respýblıkasynda pedıatrııalyq kómek kórsetýdi uıymdastyrý standartyn bekitý týraly» 2022 jylǵy 15 naýryzdaǵy buıryǵyna ózgeris engizilýine sáıkes damý jáne erte aralasý ortalyǵyn Oral qalasyndaǵy alty emhanada, Aqjaıyq, Bórli, Jańaqala aýdandyq aýrýhanalarynda jáne Báıterek aýdandyq № 2 aýrýhanasynda bıylǵy úshinshi toqsannyń sońyna deıin ashý josparlanyp otyr. Atalmysh ortalyqta ana men bala densaýlyǵyn baqylaý baǵytynda birneshe kabınet jumys isteıtin bolady. Oǵan qosa medıtsınalyq sanıtarlyq alǵashqy kómek uıymdarynda deni saý balanyń kabınetinde sábıler dúnıege kelgennen keıin skrınıngtik tekserý júrgiziledi.
— Balalar densaýlyǵy udaıy nazarda. 2025 jyly barlyǵy 188 083 bala (2024 jyly — 187 173) profılaktıkalyq tekserýden ótkizilýi tıis. Bıylǵy birinshi toqsanda oblys boıynsha 58 161 bala (2024 jyly osy merzimde — 36 129) qaraldy. Sonyń ishinde 11 695 baladan (2024 jyly birinshi toqsanda — 6 111) alǵash ret aýrý anyqtaldy, — dedi Aınash Ǵubaıdýllına.
BQO densaýlyq saqtaý basqarmasynyń shtattan tys bas pedıatry Venera Eleýsinovanyń naqtylaýynsha, oblystyq kópbeıindi balalar aýrýhanasyna jylyna 54 myńnan astam bala júginip, sonyń 12 myńnan astamy statsıonarlyq em alady. 20 myńnan astamy keńes berý-dıagnostıkalyq bólimshesine jiberiledi.
— Balalarǵa der kezinde hırýrgııalyq kómek kórsetý jáne ony ortalyqtandyrý maqsatynda bıyl jyl basynda atalǵan aýrýhanada jaq-bet hırýrgııasynyń 10 tósek-orny ashyldy. Aldaǵy ýaqytta otolarıngologııalyq jáne oftalmologııalyq tósek-oryn ashý kózdelýde, — dedi Venera Eleýsinova.
Eske sala keteıik, budan buryn Oralda úshem bosanǵan kópbalaly ananyń perzenthanadan shyqqanyn jazǵan bolatynbyz.