Básekege qabiletti kásipkerlerdi qoldaý kúsheıedi

NUR-SULTAN.QazAqparat – Shaǵyn jáne orta kásipkerlikti damytýdyń 2030 jylǵa deıingi strategııasy aıasynda salanyń jalpy ishki ónimdegi úlesin 40 paıyzǵa jetkizý kózdelip otyr, dep habarlaıdy QazAqparat tilshisi.

Úkimet otyrysynda QR Ulttyq ekonomıka mınıstriniń birinshi orynbasary Tımýr Jaqsylyqov osyndaı málimet berdi.

«Qoıylǵan maqsattar men mindetterge qol jetkizý úshin tujyrymdamada mynalar josparlanǵan:

- naryqtyń jekelegen qatysýshylaryna ádiletsiz artyqshylyqtar jasaıtyn barlyq zańnamalyq jáne retteýshilik aktilerdiń kúshin joıý;

- ShOK úshin retteýshilik kedergilerdi qysqartý;

- shekteýli bıýdjet resýrstaryn paıdalanýdyń tıimdiligin arttyrý maqsatynda jeke resýrstar aldynda ujymdyq paıdaǵa artyqshylyq berý;

- jańa bastaǵan jáne jumys istep turǵan bıznes úshin sapaly ónerkásiptik, ınnovatsııalyq jáne kreatıvti ınfraqurylymnyń artyq usynysyn jasaýdy yntalandyrý;

- bıznes eseptiligin avtomattandyrý jáne tsıfrlandyrý;

- ruqsat berý qujattaryn qysqartý», - dedi birinshi vıtse-mınıstr.

Onyń aıtýynsha, tıimdi jáne básekege qabiletti kásipkerlerdi qoldaýǵa qaıta baǵdarlaý arqyly keshendi qoldaý sharalaryn usyný júıesin qaıta qaraý usynylyp otyr.

Tujyrymdamanyń erejelerin iske asyrý 2030 jylǵa deıin:

JІÓ-degi ShOK úlesi – 40%-ǵa deıin;

JІÓ-degi orta kásipkerliktiń úlesi – 20%-ǵa deıin;

ShOK-ta jumyspen qamtylǵandar sany – 5 mln adamǵa deıin arttyrýǵa múmkindik beredi.

«Tujyrymdamany qabyldaý shaǵyn bıznesti orta jáne orta bızneske iri bızneske aınaldyrýǵa yqpal etedi, bul óz kezeginde tutastaı ekonomıkaǵa oń mýltıplıkatıvti áser etetin bolady», - dedi Tımýr Jaqsylyqov.

Atalǵan sharada Tımýr Jaqsylyqov qańtar oqıǵasy kezinde zardap shekken shaǵyn jáne orta bıznes nysandarynyń naqty sanyn ataǵan bolatyn.