Bas múftı bastamasymen «Din men dástúr» kitaby shyqty

ASTANA. 15 qarasha. QazAqparat - Imanǵa shólirkegen jandy rýhanı sýsyndatatyn izgiliktiń jarshysy bolǵan qundy kitaptarymyz taǵy bir eńbekpen tolyqty. Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyulynyń bastamasymen «Din men dástúr» kitaby jany jaqsylyqqa qushtar jamaǵatqa jol tartty.

Bul týraly Qazaqstan muschylmandary dinı basqarmasynyń baspasóz qyzmeti habarlady.

«Álhamdýlılla, ata-babamyz san ǵasyrlardan beri ańsap ótken táýelsizdikke qol jetkizýdiń arqasynda halqymyz dástúrli mádenıetine, tili men dinine tolyqqandy ıe bolyp, olardy zamanǵa saı damytýǵa múmkindik aldy. Maqsatymyz - ulttyq tabıǵatymyzben sabaqtas sharıǵattaǵy mázhabymyz ben tanymdyq mektebimizdi tuǵyrlap, asyl dúnıelerimizdi, jaýharlarymyzdy jaryqqa shyǵarý, úzilgenimizdi jalǵap, joǵaltqanymyzdy túgendeý, san ǵasyrlyq tarıhy bar dinı dástúrlerimizdi qalpyna keltirý. Qolyńyzdaǵy kitap sondaı ıgi bastamanyń jemisi», - deıdi «Din men dástúr» kitabynyń alǵy sózin jazǵan Bas múftı.

Eńbekte dástúr týraly túsinik, dástúrdiń dindegi orny, qazaq halqynyń ımanı dástúrleri, ımany qarym-qatynas, tildegi aıǵaqtar, t.b Islam men dástúrimizdiń qabysatyn tustary jaıly jan-jaqty maǵlumattar berilgen. Sonymen qatar qazaq maqal-mátelderiniń Muhammed paıǵambarymyzdyń (s.ǵ.s.) hadısterimen sáıkes keletindigine dáleldi aıǵaqtar jazylǵan. Qazaq halqynyń salt-sanasy, tanym-túsinigi, oı-tujyrymdary Islam qaǵıdattarynan bastaý alatyny pash etilgen. Qysqasy, «Din men dástúrde» osy eki uǵymnyń bir-birimen baılanysy týraly sóz bolady.