Barymtashylar shekarada ustaldy
ASTANA. QazAqparat - Taraz shekara otrıadyna qarasty «Sypataı batyr» zastavasynyń shekarashylary «KamAZ» júk kóligimen 9 jylqyny qyrǵyz jerinen zańsyz ótkizbek bolyp jatqan 2 otandasymyzdy ustady.
Bul týraly QR UQK ShQ baspasóz qyzmetinen habarlady.
Oqıǵany naqtyraq aıtar bolsaq, ózderine bekitilgen shekara bóligin qarap kele jatqan shekarashylar memlekettik shekarany kesip ótken jylqylardyń izin baıqaıdy. Tez arada iz boıynsha izdestirý jumystary júrgiziledi, kóp uzamaı shekaradan 600 metr jerdegi Qasqasý saıynyń ishinen jylqylardy qýalap kele jatqan úsh salt atty baıqalady. Qardyń qalyńdyǵy, oıly-qyrly jer barymtashylardyń sońynan qýalaýdy qıyndata túsedi. Barymtashylardyń oıyn seze qoıǵan shekarashylar Qasqasýdyń shyǵa berisine qaraı, ıaǵnı Qyzylsaı aýylyna qaraı baǵyt ustaıdy. Olar osy jerde jylqylardy «KamAZ» mashınasyna tıep jatqandardyń ústinen tústi.
Narıadty baıqap qalǵan barymtashylardyń úsheýi shekarashylardyń talabyn oryndamastan tura qashyp boı tasalady, ekeýi mashınamen sytylyp ketpek boldy. Shekarashylardyń amal joq, qarý qoldanýyna týra keldi, bir oq aspanǵa, eki oq mashınanyń dóńgelegine qaraı atyldy.
Qarý qoldaný kezinde eshkim zardap shekken joq. Barymtashylar jylqylarymen birge ustaldy.
Atalǵan derek boıynsha quqyqqorǵaý organdary habarlandyryldy, tergeý amaldary júrgizilýde.
