Barlyq vedomstvolyq júıe QazTech biryńǵaı platformasyna kóshiriledi

ASTANA. KAZINFORM — Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev eldegi barlyq vedomstvolyq júıeni QazTech biryńǵaı platformasyna kóshirý jumystary týraly aıtyp berdi.

Mınıstrdiń aıtýynsha, tsıfrlandyrýdyń qarqyndy damýy memlekettiń tsıfrlyq ınfraqurylymynda birqatar problemalyq másele týyndatty. 

— Júıelerdiń bytyrańqylyǵyn joıý úshin olardy QazTech biryńǵaı platformasyna kezeń-kezeńimen kóshirý bastaldy. Ótken jyldyń sońynda memlekettik aqparattyq júıelerdiń tolyq túgendeýi aıaqtaldy. Eskirgen jáne birin-biri qaıtalaıtyn aqparattyq júıeler ońtaılandyrylady, — dedi J. Mádıev Úkimettiń keńeıtilgen otyrysynda.

Mysaly, aýdıt júrgizilgen kezde Densaýlyq saqtaý mınıstrliginde 30-dan astam júıe bolǵan, olar ońtaılandyrý nátıjesinde 8 júıege deıin qysqartylyp, QazTech platformasyna kóshiriledi.

— Bıyl ortalyq memlekettik organdardyń barlyq aqparattyq júıesiniń 30 paıyzyn kóshirý josparlanyp otyr. Kıberqaýipsizdikke kelsek, barlyq qajetti talap qoldanystaǵy zańnamada bekitilgen. Olardy saqtamaǵany úshin jaýapkershilikti kúsheıtý jumysy jalǵasady, — dep tolyqtyrdy J. Mádıev.

Buǵan deıin Memleket basshysy Qasym-Jomart Toqaev eldegi vedomstvolyq aqparattyq júıelerdi QazTech biryńǵaı platformasyna kóshirý jumysy kimniń qarajatyna jasalatynyn suraǵan edi.