Balqashtyń sý deńgeıi 12 sm-ge kóterildi

ASTANA. KAZINFORM — Bir jylda Balqash kólinde sý deńgeıi Baltyq júıesi boıynsha 341,52 metrden 341,64 metrge deıin, ıaǵnı 12 santımetrge kóterildi.

Sý resýrstary jáne ırrıgatsııa mınıstrliginiń málimetinshe, sý kólemi 2 mlrd tekshe metrge ulǵaıdy. 2025 jyldyń basynan beri Qapshaǵaı sý qoımasynan Balqashqa 3,8 mlrd tekshe metr sý jiberildi. Byltyr osy kezeńde bul kórsetkish 2,9 mlrd tekshe metr bolatyn. Bul óńirdiń ekologııalyq ahýalyna jáne Іle ózeniniń saǵasyna oń áserin tıgizip otyr. Qapshaǵaı sý qoımasyn toltyrý Aqdala jáne Sheńgeldi sýarmaly alqaptarynda sýarý maýsymyn joǵary deńgeıde ótkizýge múmkindik beredi. Balqash kólindegi sý kólemi transshekaralyq Іle ózenine baılanysty. Ózen aǵysy Qapshaǵaı sý qoımasy arqyly retteledi. Bıyl sý qoımasynan Balqashqa 12 mlrd tekshe metr sý jiberý josparlanyp otyr.

— Mınıstrlik Balqash kóline qajetti sý kólemin qamtamasyz etý boıynsha keshendi jumys júrgizip jatyr. Kelesi aptada Frantsııadan kelgen sarapshylarmen birge Balqashty saqtaý boıynsha 2040 jylǵa deıingi master-jospardy ázirleý máselesin talqylaımyz. Byltyr biz kól alabyn birlesip zertteý týraly kelisimge qol jetkizgenimizdi eske salǵym keledi, — dedi Sý resýrstary jáne ırrıgatsııa mınıstri Nurjan Nurjigitov.

Osyǵan deıin Jaıyq ózenindegi sý deńgeıi tómendeı bastaǵany málim boldy.