Balqashta zańsyz balyq aýlaǵan er adamdar ustaldy

QARAǴANDY. QazAqparat - Qaraǵandy oblysynyń polıtseıleri Balqash kólinde reıdtik is-sharalar ótkizdi, dep habarlaıdy QazAqparat Polisia.kz-ke silteme jasap.

20 qańtar kúni tabıǵatty qorǵaý bóliminiń qyzmetkerleri uıymdasqan qylmysqa qarsy kúres basqarmasynyń, sondaı-aq departamenttiń arnaıy maqsattaǵy qyzmetkerlerimen jáne Balqash qalasy balyq ınspektsııasy mamandarymen birlesip júrgizgen keshendi is-sharalar barysynda kólde balyq aýlap otyrǵan eki azamatty ustady. Ustalǵandardyń árqaısysynan bir qap balyq jáne balyq aýlaýǵa tıym salynǵan zattar tárkilendi.

Máselen, Jambyl oblysynyń 34 jastaǵy turǵynynan 57 keli ártúrli balyq pen 300 metr tıym salynǵan aý, 31 jastaǵy jergilikti turǵynnan 78 keli balyq pen 200 metr aý tárkilenip alyndy. Keltirilgen shyǵyn kólemi 739 myń teńgeni qurady.

Atalǵan derekter boıynsha QR QK-niń 335-baby 1-bóligine sáıkes is qozǵalyp, tergeý amaldary júrgizilýde.

Foto: polisia.kz