Balqash – tazalyq deńgeıin tsıfrmen kórsetetin alǵashqy qala

BALQASh. KAZINFORM – Qaraǵandy oblysynyń Balqash qalasynda qoǵamdyq keńistik pen ekologııalyq ahýaldy baqylaýǵa arnalǵan jańa tsıfrlyq joba iske qosyldy. Qala oblysta alǵash bolyp abattandyrý men tazalyq deńgeıin naqty ýaqytta kórsetetin eseptegishter júıesin engizdi.

Qalanyń túrli núktelerine ornatylǵan 16 jaryqdıodty ekranda kommýnaldyq jáne ekologııalyq qyzmetterdiń jumysy ashyq formatta kórsetiledi. Onda shyǵarylǵan qoqys kólemi, ornatylǵan qoqys jáshikteriniń sany, ótkizilgen ekologııalyq aktsııalar, zańsyz qoqys alańdarynyń joıylýy, jóndelgen aýlalar men jol ınfraqurylymy boıynsha derekter kúndelikti jańartylyp turady.

Qalalyq ákimdiktiń habarlaýynsha, jaqyn arada bul eseptegishterdiń fýnktsııasy keńeıip, jasyl jelek aýmaǵy, jol jóndeý jumystary jáne basqa da abattandyrý baǵyttary boıynsha málimetter qosylady.

– Biz turǵyndardyń qalada atqarylyp jatqan jumysty tek sóz júzinde emes, naqty sandarmen kórýin qalaımyz. Bul júıe – «Taza Qazaqstan» ekojobasynyń aıasynda júzege asyrylyp jatqan naqty nátıjelerdiń kórsetkishi. Tazalyq eseptegishi – turǵyn men qyzmet kórsetýshi arasyndaǵy senim kópiri, – deıdi qala ákimi Sapar Sataev.

Jobanyń basty maqsaty – atqarýshy organdardyń jumysyn ashyq etý, turǵyndardyń qala tirshiligine belsendi aralasýyna jol ashý jáne kún saıynǵy naqty kórsetkishter arqyly qalanyń damý qarqynyn kórsetý.

Balqash ákimdigi bul bastama qala turǵyndary men kommýnaldyq qyzmetter arasynda senimdi arttyryp qana qoımaı, ýrbanıstik ortany damytýǵa baǵyttalǵan jańa tsıfrlyq standarttardy qalyptastyrady dep otyr.

Aıta keteıik, bıylǵy jyldyń alǵashqy alty aıynda Balqash kóliniń deńgeıi Baltyq ólshem júıesi boıynsha orta eseppen 32 santımetrge kóterilgen. Eger qysta kól deńgeıi 341,55 metr bolsa, jazǵa qaraı bul kórsetkish 341,87 metrge jetti.