Balqash kólinde demalys tótenshe jaǵdaıǵa ulasty
BALQASh. KAZINFORM — Balqash kólindegi demalys bir top týrıst úshin qaıǵyly jaǵdaımen aıaqtala jazdady. Katermen serýendeý kezinde eki qyz sýǵa túsip ketken. Olardyń biri esinen tanyp qalsa, ekinshisi jaraqat aldy.
Kýágerlerdiń aıtýynsha, oqıǵanyń sebebi — jolaýshylardyń biri júze almaıtynyn eskertkenine qaramastan, kater júrgizýshisi burylyp, qaýipti jaǵdaı týdyrǵan.
Zardap shekkender polıtsııaǵa júgingen. Qyzdardyń birine keıin pnevmonııa dıagnozy qoıyldy.
Qaraǵandy oblysy polıtsııa departamentiniń málimetinshe, 8 tamyzda Astananyń 24 jastaǵy turǵyny qaýipsizdik talaptaryna saı kelmeıtin qyzmet kórsetý faktisi boıynsha aryz bergen. Atalǵan derekke qatysty qylmystyq is qozǵaldy, barlyq qatysýshylar anyqtalyp, tergeý júrgizgen.
— Oqıǵanyń mán-jaıyn, quqyq buzýshylyqqa sebep bolǵan jaǵdaılar men sebepterdi anyqtaýǵa, sondaı-aq kinálilerdi zań aıasynda qatań jaýapkershilikke tartýǵa baǵyttalǵan tolyq kólemdegi tergeý áreketteri júrgizilýde. Qaraǵandy oblysy polıtsııa departamenti mundaı azamattardyń ómiri men densaýlyǵyna qaýip tóndiretin quqyq buzýshylyqtar qatań toqtatylatynyn atap ótedi. Kináliler tıisti jazasyn alady, — delingen oblystyq PD baspasóz qyzmetiniń habarlamasynda.
Buǵan deıin Alakól kólinde, jaǵadan shamamen 200-250 metr qashyqtyqta, kater sý betinde júzip júrgen áıeldi qaǵyp ketkeni habarlanǵan edi. Jaraqat saldarynan ol kóz jumdy.