Balabaqshadaǵy ıgi bastama qýantty

ASTANA. QazAqparat - Bıyl Elbasynyń bastamasymen qurylǵan Qazaqstan halqy Assambleıasyna 20 jyl toldy. Memleketimizdegi ultaralyq tatýlyq pen kelisimdi ornyqtyrýdyń biregeı ınstıtýty halyqty bir ıdeıa, bir maqsat tóńiregine toptastyra bilý jolynda óziniń ómirsheńdigin dáleldedi.

Qazaqstan halqy Assambleıasy óz jumysynda memlekettik tilge de úlken nazar aýdaryp otyr. Assambleıanyń músheleriniń arasynda belgili qoǵam qaıratkerleri Asyly Osman, Rozaqul Halmuradov syndy til janashyrlaryn barsha halyq biledi.

Búginde ózge ult ókilderiniń memlekettik tildi meńgerýge, úırenýge degen talaby bıiktep kele jatqany qýantady. Solardyń arasynda óz balalaryn qazaq balabaqshasyna berip, qazaq mektepterinde oqytyp jatqan otandastarymyz qanshama. Máselen, biz Almaty qalasy, Jetisý aýdanyna qarasty №103 sanatorııalyq balabaqshasynda bolǵanymyzda osynyń kýási bolyp qaıtyq. Bir aıta keterligi, atalmysh balabaqshada otbasynda ókpeniń qabynýy men tynys joldaryna salqyn tıip syrqattanǵan balalar saýyqtyrylyp, tárbıelenedi. Munda balalardyń densaýlyǵyn jaqsartý men saýyqtyrýǵa qajetti jaǵdaıdyń barlyǵy jasalǵan. Bir mezgilde 120 balaǵa qyzmet etetin sanatorııalyq balabaqshaǵa balalar 6 aı nemese 1 jylǵa keledi. Balalardyń densaýlyǵyn jaqsartý barysynda emdik dene shynyqtyrý saǵattary jáne saýyqtyrý is-sharalary júrgiziledi.

Biz balabaqshamen tanysý barysynda densaýlyǵy myqty, oıyn emin-erkin jetkize alatyn, mýzykalyq aspaptarda oınaýdy da, sýret salýdy da meńgergen, kitap oqyp, onyń maǵynasyna mán beretin, eń bastysy - qazaq tilinde sóıleıtin jas urpaq ósip keletinin baıqadyq. Jyl saıyn jańaryp otyratyn 6 toptaǵy 120 balanyń ishindegi ózge ult balalarynyń az ýaqyttyń ishinde qazaqsha sóıleýge talaptanyp, jaqsy nátıje kórsetip júrgenine qýandyq.

Balabaqshanyń negizgi baǵyt-baǵdary týraly áńgimelep bergen balabaqsha meńgerýshisi Baıan Satybaldıeva: «Bizde 28 jyldyq tájirıbesi bar tárbıeshiler jumys isteıdi. Balalar ata-analarmen birge estafetalyq jarystarǵa qatysady. Balabaqshada kórkem ádebıet, dene tárbıesi, sýret salý, mýzykalyq aspaptarda oınaý sabaqtarymen qatar, til damytýǵa erekshe kóńil bólinedi. Qys mezgilinde «Qysqy oıyndar jarysy», «Shymyr bolsyn denemiz» jáne taǵy basqa sporttyq sharalar jıi ótkiziledi», - dedi.

Óz balasyn memlekettik tildi jetik bilsin dep osy balabaqshaǵa bergen Svetlana esimdi ata-anany da áńgimege tartqan edik. Ol balabaqshanyń qyzmetine dán rıza ekenin, balasynyń osynda kelgeli qazaqsha til syndyryp, memlekettik tildi jaqsy meńgerip kele jatqanyn atap ótti.

«Meniń oıymsha, árbir Qazaqstan azamaty memlekettik tildi bilýi kerek. Óıtkeni elimizdiń bolashaǵy qazaq tilinde. Men Elbasynyń osy sózin balama árdaıym aıtyp otyramyn», - deıdi Svetlana.

Al Baıan Satybaldıeva ózge ult ókilderiniń balalary bir-eki aptada qazaqtyń kúndelikti turmystyq sózderin úırenip alatynyn aıtty. «Bizden oqyp ketken orys balalary qazaq mektebine baramyz deıtini qýantady», - dedi ol.

Memlekettik tildiń qoldanys aıasynyń keńeıýine osylaısha ózindik úles qosyp jatqan balabaqshanyń bir kúndik jumysy rasynda kóńil qýantarlyq jaǵdaıda eken. Qaladaǵy qazaqy balabaqshalardan tárbıeli hám tálimdi urpaq bolashaqqa qadam basyp jatsa, erteńimiz jarqyn bolary sózsiz.