Baqytty otbasy: SQO-da 100-ge jýyq úıelmen baspanaly boldy

PETROPAVL. QazAqparat – Soltústik Qazaqstan oblysynda «Baqytty otbasy» baǵdarlamasyna qatysýǵa 156 turǵynnan ótinish tússe, sonyń 91-i baspanaly boldy, dep habarlaıdy QazAqparat tilshisi.

«Baqytty otbasy» baǵdarlamasy 2019 jyldyń 15 shildesinen bastap júzege asyrylyp jatyr. Onyń sharapatyn kópbalaly, tolyq emes jáne múgedek bala tárbıelep otyrǵan otbasylar kóre alady. Osy maqsatqa memlekettik qazynadan 50 mlrd teńge bólindi.

SQO-da 1 mlrd 426 mln teńgege 156 ótinish qabyldandy. Olardyń 153-i oń jaýap alyp, búginde 91-i qonys toıyn toılady. Solardyń biri – kóp balasy bar Eskendir Qalıhanuly.

«Kóp jyldan beri páter jaldap turyp keldik. Tapqan tabysymnyń basym bóligi páter aqysyna ketetin. Sondyqtan «Baqytty otbasy» memlekettik baǵdarlamasy jaıynda estigende birden qatysýdy uıǵardym. Ákimdikke baspana kezegine turdym. Ol jaqtan maǵan baǵdarlamaǵa qatysýǵa joldama berdi. 1,5 aıdyń ishinde páterge qol jetkizip otyrmyn», - deıdi qala turǵyny.

Mamandardyń aıtýynsha, ıpotekalyq nesıe 2%-ben beriledi. Bastapqy jarna úı baǵasynyń 10% quraıdy. Baǵdarlamaǵa qatysatyn otbasy quny 10 mln teńgege deıingi baspanany nesıege satyp ala alady.

«Shilde aıynan beri jergilikti ákimdik kóp balaly, tolyq emes jáne múgedek balalardy tárbıelep jatqan otbasylarǵa baǵdarlamaǵa qatysýǵa 200 joldama berdi. Olardyń 156-sy bizdiń bankke ótinish qaldyryp, 153-shi maquldandy. 3 otbasynyń qujaty qaralyp jatyr, jaqynda baqytty otbasylardyń qataryna qosylady. 91 otbasyǵa 878 mln teńgeniń ıpotekalyq nesıesi berilip, olar qonys toılaryn toılady», - deıdi memlekettik baǵdarlamanyń operatory, «Turǵyn úı qurylys jınaq banki» SQOF dırektory Almas Japabaev.