Baqyt Sultanov Prezıdent synyna qatysty pikir bildirdi

NUR-SULTAN. QazAqparat – QR Saýda jáne ıntegratsııalar mınıstri Baqyt Sultanov «Ulttyq taýar ótkizý júıesin iske qosýdyń ne sebepti keshiktirilgenin túsindirdi, dep habarlaıdy QazAqparat tilshisi.

Keshe Prezıdent Qasym-Jomart Toqaev azyq-túlik ónimderiniń naqty jáne baǵalyq qoljetimdiligin qamtamasyz etý, azyq-túlik qaýipsizdiginiń is júzindegi kórsetkishterine qol jetkizý boıynsha birqatar naqty tapsyrmalar bergen edi.

«Ulttyq taýar ótkizý júıesin iske qosýǵa qatysty shynynda da, bul jobany júzege asyrý birqatar sýbektıvti jáne obektıvti sebepterge baılanysty keshiktirildi. Atap aıtqanda, bıýdjetke júktemeni tómendetý maqsatynda qańtar-aqpanda qarjylandyrý sharttary ózgergen jobany memlekettik jekeshelik áriptestik sharty sheńberinde memleket mindettemesiniń deńgeıin qaıta qaraýdy talap etti», - dedi mınıstr Úkimet úıinde ótken baspasóz máslıhatynda.

B. Sultanovtyń aıtýynsha, qarjylandyrý quraldaryn qaıta qaraý jáne oǵan jańa ınvestorlardy tartý boıynsha konsortsıýmmen kelissózder júrgizildi.

«Memleket basshysynyń eskertýlerin eskere otyryp, biz ulttyq taýar ótkizý júıesin qurýdyń qoldanystaǵy modelin qaıta qaraý jumystaryn bastadyq. Qazir biz múddeli ınvestorlardy tarta otyryp, kóterme saýda ortalyqtaryn qurýdyń birneshe balama stsenarıılerin qarastyryp jatyrmyz. Osyǵan baılanysty, belgilengen merzimde ıaǵnı bıylǵy qazan aıyna deıin tıisti tásilder Memleket basshysyna baıandalady», - dedi Baqyt Sultanov.

Eske sala ketsek, keshe Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalady.