Baqytjan Saǵyntaev ShYU Bas hatshysy Chjan Mınmen kelissóz júrgizdi
ASTANA. KAZINFORM — Eýrazııa ekonomıkalyq komıssııa alqasynyń tóraǵasy Baqytjan Saǵyntaev pen Shanhaı yntymaqtastyq uıymynyń (ShYU) Bas hatshysy Chjan Mın 3 shilde kúni Astanada ótken kelissóz barysynda aldaǵy ózara is-qımyl aıasynda jan-jaqty pikir almasty.
Atap aıtqanda, taraptar EEK pen ShYU hatshylyǵy arasyndaǵy ózara túsinistik týraly memorandým sheńberinde Eýrazııa ekonomıkalyq odaǵy elderi men ShYU arasyndaǵy yntymaqtastyqtyń keleshegin talqylady.
Áńgime barysynda Baqytjan Saǵyntaev qazirgi ýaqytta atalǵan memorandýmdy júzege asyrý is-sharalarynyń josparyn daıyndaý aıaqtalyp jatqanyn atap ótti.
Osyǵan baılanysty EEK alqasynyń tóraǵasy qujatqa qol qoıýdy bıyl kúzde Armenııada ótetin Eýrazııalyq ekonomıkalyq forým aıasynda uıymdastyrýdy usyndy.
EEK alqasynyń basshysy Eýrazııalyq ekonomıkalyq odaq memleketteriniń halyqaralyq kólik dálizderin, mýltımodaldy jáne konteınerlik tasymaldy damytýǵa, óńirdegi júk tasymaldaryn tsıfrlandyrýǵa múddeli ekenin atap ótti.
Osyǵan baılanysty birlesken sharalardy ázirleý úshin Baqytjan Saǵyntaev aldaǵy ýaqytta ShYU-ǵa qatysýshy elderdiń kólik mınıstrleriniń jáne EAEO memleketteriniń kólik salasyndaǵy ýákiletti organ basshylary keńesiniń birlesken otyrysyn ótkizýdi usyndy.
Taraptar sondaı-aq ShYU shtab-páterinde «EAEO kúnderin» ótkizý týraly EEK bastamasyn qarady.
«Bul is-shara bıznes-qoǵamdastyq ókilderiniń nazaryn aýdaratyny sózsiz. Tájirıbe almasý elder arasyndaǵy saýda-ekonomıkalyq yntymaqtastyqty damytýǵa yqpal etetinine senimdimin», — dedi Baqytjan Saǵyntaev.
Óz kezeginde Chjan Mın ShYU men EAEO arasyndaǵy ózara árekettestik faktory zamanaýı álemdik sáýlet ónerinde barǵan saıyn mańyzdy bolyp kele jatqanyn atap ótti.
Ekonomıkalyq máseleler boıynsha praktıkalyq tájirıbe almasýǵa basa nazar aýdara otyryp, ıntegratsııalyq dıalog Úlken Eýrazııany damytý úshin qolaıly jáne boljamdy jaǵdaılardy qamtamasyz etýge arnalǵanyn aıtty.
