Baǵdarlama baıypty oryndalýda
Búginde bul tıisti somanyń 89,7 paıyzyn qurap otyr. Bul týraly Ortalyq kommýnıkatsııalar qyzmetinde ótken baspasóz máslıhatynda baıandama jasaǵan Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov málimdedi.
«8,8 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 9,5 paıyzǵa artyq. Baǵdarlamanyń jyldyq josparyna oraı turǵyn úılerdi paıdalanýǵa berý kólemi 87 paıyzǵa oryndaldy. Barlyǵy 69,9 myń baspana salyndy», dep atap ótti M.Jaıymbetov. Qurylys jáne turǵyn úı-kommýnaldyq sharýashylyq isteri komıteti tóraǵasynyń aıtýynsha, qazir turǵyn úılerdi paıdalanýǵa berý elimizdiń 15 óńirinde qarqyndy júrgizilip keledi. Bulardyń ishinde kósh basynda turǵan Mańǵystaý (464,2 myń shm), Almaty (387,3 myń shm), Qyzylorda (381,3 myń shm) jáne Atyraý (373,6 myń shm) oblystary. Atalǵan aımaqtar jeke turǵyn úılerdi paıdalanýǵa berý boıynsha da alda keledi.
«Baǵdarlamanyń birinshi baǵyty boıynsha bıyl ákimdikterge 25 mlrd teńge bólindi. 20,4 mlrd teńge aýdaryldy, 93,7 paıyz nemese 19,1 mlrd teńge ıgerildi. Nátıjesinde, 6 myńǵa jýyq páterdiń qurylysy bastaldy. Onyń jartysy bıyl tapsyrylatyn bolady. Bul baǵyt baspana satyp alýǵa múmkindikteri joq áleýmettik álsiz toptardy arendalyq baspanamen qamtamasyz etýge arnalǵan. Olarǵa memleket arendalyq páter beredi. Bul satyp alý quqyǵynsyz beriletin tegin baspana. Áleýmettik turǵyn úıdiń tólemi 1 sharshy metrine shamamen 100 teńgeden keledi», dedi komıtet tóraǵasy.
Onyń sózinshe, ekinshi baǵyt jeke turǵyn úı qurylysyn damytýǵa arnalǵan. Búginde 60 myń jer ýchaskesine jeliler tartylyp jatyr. Jalpy, jyl saıyn atalǵan jumystardy júrgizý úshin 80 mlrd teńge bólý kózdelgen. Budan bólek, qazir elimizdiń 6 oblysynyń ortalyǵynda biryńǵaı sáýlet stılinde 1975 jeke úıdiń qurylysy júrip jatyr. Jyl sońyna deıin onyń 362-si qoldanysqa beriledi dep kútilýde (Aqtóbe, Qostanaı, Almaty, SQO).
Sondaı-aq 10 aıdyń qorytyndysy boıynsha josparlanǵan 15 myń kredıttik páterdiń 8770-i paıdalanýǵa berilgen. Qurylys salýshylardy turǵyn úı salýǵa yntalandyrý jumystary da belsendi júrgizilýde. «Nurly jer» baǵdarlamasy aıasynda 152 mlrd teńge somasynda qurylys salýshylarǵa sýbsıdııalanǵan kredıt berý jáne 2018-2019 jyldary 600 myń shm turǵyn úıdiń qurylysyn qamtamasyz etý josparlanyp otyr.
«Nurly jer» baǵdarlamasy arqyly qazir óńirlerde ekinshi deńgeıdegi 5 bank halyqqa jańa turǵyn úı satyp alýǵa jeńildetilgen ıpoteka berýdi júrgizip jatyr. Búginde bankter 7,9 mlrd teńgeniń 797 ótinishin qabyldady. Onyń ishinde 747 ótinish maquldanyp,7,4 mlrd teńgeniń kelisimi jasalǵan.
