BAÁ men Úndistan elimizden halal et ónimderin alǵysy keledi
ASTANA. KAZINFORM – Bul týraly Aýyl sharýashylyǵy mınıstri Aıdarbek Saparovtyń Lulu Kazakhstan kompanııasynyń bas dırektory Mohıdın Hýseın Faısalmen, sondaı-aq IGateway Ltd kompanııasynyń negizin qalaýshy ári bas atqarýshy dırektory (CEO) Gýnasılan Aıothı Danıelmen kezdesýi barysynda aıtyldy.
QR Aýyl sharýashylyǵy mınıstrligi bapasóz qyzmetiniń habarlaýynsha, kezdesý barysynda taraptar saýda-ekonomıkalyq yntymaqtastyqty damytý máselelerin jáne qazaqstandyq mal sharýashylyǵy ónimderin Birikken Arab Ámirlikteri men Úndistan naryqtaryna jetkizý múmkindikterin talqylady.
Sheteldik tarap halyqaralyq veterınarııalyq-sanıtarııalyq jáne sapa talaptaryna sáıkes keletin eshki etin, sondaı-aq basqa da halal et ónimderin ımporttaýǵa qyzyǵýshylyq bildirdi. Úndistannyń tutyný naryǵynyń qarqyndy ósýi otandyq mal sharýashylyǵy ónimderiniń eksportyn keńeıtý úshin qosymsha múmkindikter ashatyny atap ótildi.
Mınıstr Qazaqstannyń mal sharýashylyǵy salasynda aıtarlyqtaı áleýeti bar ekenin jáne veterınarııalyq talaptar saqtalyp, turaqty jetkizilim qamtamasyz etilgen jaǵdaıda eksport kólemin arttyrý múmkindigin qarastyrýǵa daıyn ekenin atap ótti.
- Kezdesý qorytyndysy boıynsha taraptar veterınarııalyq sertıfıkattaý, logıstıka máseleleri, sondaı-aq qazaqstandyq óndirýshiler men úndistandyq ımporttaýshylar arasynda tikeleı baılanystar ornatý syndy praktıkalyq yntymaqtastyq tetikterin odan ári pysyqtaýǵa kelisti, - delingen habarlamada.
Aıta keteıik, LuLu Group International bólshek saýdamen, ımport jáne eksportpen aınalysady, sondaı-aq Birikken Arab Ámirlikteri men Úndistanda et óńdeý zaýyttaryn basqarady.
Osyǵan deıin elimizde aýyl sharýashylyǵyndaǵy jalpy ónim keıingi on jylda 2,5 ese óskeni týraly jazdyq.