BAÁ elshisi Elbasyna «Beıbitshilik kilemin» tabystady

NUR-SULTAN. QazAqparat - Nursultan Nazarbaev Birikken Arab Ámirlikteriniń Qazaqstan Respýblıkasyndaǵy Tótenshe jáne Ókiletti Elshisi Muhammed ál-Djabermen kezdesti. Bul jóninde Elbasynyń resmı saıtyna silteme jasap QazAqparat habarlaıdy.

Kezdesý barysynda eki jaqty qatynastardy nyǵaıtýdyń, Qazaqstan men BAÁ arasyndaǵy ózara tıimdi yntymaqtastyqty damytýdyń, mádenı baılanystardy keńeıtýdiń mańyzdylyǵy jaıly aıtyldy.

- Qazaqstan táýelsizdigin alǵannan beri bizdiń qarym-qatynasymyz óte qarqyndy damyp keledi. Biz árdaıym BAÁ basshylyǵymen tyǵyz baılanysta boldyq. Osynyń arqasynda elderimiz arasyndaǵy vızasyz rejım máselesin sheshtik, reısterdiń sanyn kóbeıttik. Bul týrısterdiń artýyna jol ashyp, tutastaı ekonomıkalyq qatynastardyń keńeıýine áser etti, - dedi Nursultan Nazarbaev.

Óz kezeginde Muhammed al-Djaber BAÁ basshylyǵy atynan Qazaqstannyń odan ári tabysty damýy men órkendeýin tileı otyryp, Nursultan Nazarbaevty jáne Qazaqstan halqyn Táýelsizdik kúnimen quttyqtady.

- Qazaqstan - Ortalyq Azııadaǵy mańyzdy seriktesterdiń biri. Biz vızasyz rejım týraly kelisimge qol jetkizýdi oń baǵalaımyz. Bul kásipkerler arasyndaǵy baılanyst jeńildetýge jáne ınvestıtsııalyq belsendilikke yqpal etedi, - dedi Elshi.

Sonymen qatar, dıplomat Nursultan Nazarbaevqa mártebeli sheıh Fatıma bınt Muhammed bın Zaıdtiń gýmanıtarlyq jobasy aıasynda jasalǵan «Beıbitshilik kilemin» tabystady.

Aıta keteıik, «Beıbitshilik kilemi» jobasy kilem toqýdyń dástúrli qolónerin nasıhattaýǵa jáne soǵys beıneleriniń osy ónerge enýine qarsy turýǵa baǵyttalǵan. Joba aıasynda qolónershiler beıbit jáne gúldengen ómir týraly ózderiniń kózqarastarymen kilemder toqıdy.

Ol áskerı qaqtyǵys, jaýyngerler men qarý-jaraq beınelengen «soǵys» taqyrybyndaǵy aýǵan kilemderin jasaý dástúrine qarsy baǵyttalǵan joba.