Azıada-2018: Dmıtrıı Balandın fınalǵa shyqty

DJAKARTA. QazAqparat - Indonezııada ótip jatqan HVIII Jazǵy Azııa oıyndarynda búgin Rıo Olımpıadasynyń chempıony Dmıtrıı Balandın brass ádisimen 100 metrge júzýde Azııa oıyndarynyń fınalyna ótti, dep habarlaıdy QazAqparat tilshisi.

QR UOK baspasóz qyzmeti málim etkendeı, ol irikteý kezeńinde márege ekinshi bolyp keldi. Onyń kórsetkishi - 1.00.07. Birinshi orynda bizdiń sportshydan sál ǵana ozyp ketken qytaılyq sportshy tur.

Dmıtrıı Balandın jaraqatyna baılanysty 200 metrge brass ádisimen júzý jarysyna qatyspaıdy. Dál osy qashyqtyqta Balandın Rıo Olımpıadasynyń chempıony atanǵan bolatyn.

Al osy qashyqtyqta synǵa túsken taǵy bir qazaqstandyq sportshy Álibek Qamzenov irikteý kezeńinde 14-shi orynǵa shyǵyp, jarystan tys qalsa, taǵy bir otandasymyz Ádilbek Mýsın 100 metr qashyqtyqta batterflıaı ádisimen júzýde 52.99 sekýnd nátıje kórsetip, fınalǵa joldama aldy. Ádilbek Mýsın óz tobynda Rıo Olımpıadasynyń chempıony, sıngapýrlyq Djozef Skýlıngti ǵana aldyna jiberip, ekinshi nátıje kórsetti.

Jalpy esepte 5-shi oryn alǵan jerlesimiz endi fınaldyq básekede baq synaıdy.

Aqtyq saıys búgin Astana ýaqytymen keshki saǵat 17:00-de ótedi.