Ázerbaıjan Kaspıı teńizinde jasandy araldar salady
ASTANA. KAZINFORM – Ázerbaıjan úkimeti Kaspıı teńizinde jasandy jer ýchaskelerin qurý úshin ınvestorlar tartýdy kózdep otyr. Bul týraly Parlament otyrysynda Memlekettik qala qurylysy jáne sáýlet komıtetiniń basshysy Rashad Ismaılov málim etti.
«Bul jerler Kaspıı teńiziniń ázerbaıjandyq sektorynyń soltústiginde, ońtústik jaǵalaýynda qurylady, olar Bakýdiń bas josparynda eskerilmegen», - dedi ol Parlamenttiń Ekonomıkalyq saıasat, ónerkásip jáne kásipkerlik komıtetiniń «Kaspıı teńiziniń Ázerbaıjan sektoryndaǵy jasandy jer ýchaskelerin qurý týraly» taqyrybynda ótken otyrysynda.
Onyń aıtýynsha, zań jobasynda jasandy jer ýchaskelerin qurýdyń erekshelikteri kórsetilgen.
«Qurylys jobalary Qala qurylysy kodeksine sáıkes ázirlenetin bolady. Bul rette olardyń ekologııalyq jáne basqa da saldary eskeriledi», - dep qosty apparat basshysy.
Buǵan deıin jergilikti BAQ bul zań jobasynyń Ázerbaıjan parlamentine jiberilgenin, jaqyn arada talqylaýǵa shyǵarylatynyn habarlaǵan bolatyn. Zań jobasy tek Bakýge ǵana qatysty emes. Jasandy araldar Nabran, Lıankıaran jáne basqa jerlerde de salynýy múmkin.
Kúzde Kaspıı teńizinde jasandy araldar qurý boıynsha jobalaý jumystary bastalady dep boljanǵan. Olar bolashaqta el astanasy Baký men jasandy jer ýchaskeleri arasynda avtomobıl joldaryn salýdy, sondaı-aq osy araldarǵa parom jáne keme qatynasyn ashýdy kózdeıdi.
