Ázerbaıjan «Erevan dıaloginen» keıin Armenııany synǵa aldy

ASTANA. KAZINFORM — Ázerbaıjan 26 mamyrda ótken «Erevan dıalogi» konferentsııasynda Armenııa premer-mınıstriniń sóılegen sózinen keıin ony qatań synǵ aldy, dep habarlady Kazinform agenttiginiń menshikti tilshisi Ázerbaıjannyń Syrtqy ister mınıstrligine silteme jasap.

Mınıstrlik ókili Aıhan Gadjızadeniń pikirinshe, Armenııanyń ustanymy – konstıtýtsııany ózgertýden jáne aýmaqtyq talaptardan bas tartýǵa qulyqsyzdyqty bildiredi, bul beıbitshilikke daıyn ekenine kúmán týdyrady.

Baký sonymen qatar EQYU Mınsk tobyn eskirgen mehanızm dep atap, ony taratý qajet ekenin alǵa tartty. Ázerbaıjan el arasyndaǵy qaqtyǵystyń óz aýmaqtaryn uzaq ýaqyt boıǵy okkýpatsııadan azat etý arqyly aıaqtalǵanyn málimdeıdi. Armenııanyń «Batys Ázerbaıjan» jónindegi málimdemelerin Baký faktilerdi burmalaý jáne buryn osy óńirde ómir súrgen etnıkalyq ázerbaıjandardyń quqyqtaryn qorǵaýǵa úndeý dep baǵalap otyr.

— Ázerbaıjan óńirlik yntymaqtastyq pen ekonomıkalyq yqpaldastyqty alǵa jyljytý úshin kedergisiz tranzıtke qoldaý bildiretinin rastady, — delingen málimdemede.

Press-hatshy Armenııany konstıtýtsııalyq ózgerister engizip, aýmaqtyq talaptardan bas tartýǵa jáne Mınsk tobyn eshqandaı shartsyz taratýǵa shaqyrdy.

Buǵan deıin, sáýir aıynda, Armenııa premer-mınıstri Nıkol Pashınıan Ázerbaıjanǵa beıbit kelisim men EQYU Mınsk tobyn taratý týraly birlesken málimdemege bir ýaqytta qol qoıýdy usynǵan edi.

Naýryz aıynda Baký men Erevan beıbit kelisim mátini boıynsha kelissózderdi aıaqtaǵany habarlanǵan.

Osy aıda Ázerbaıjan Qorǵanys mınıstrligi Armenııa Qarýly kúshteriniń barlaý ushýlarynyń joly kesilgenin málimdedi.

Eske sala keteıik, buǵan deıin Nıkol Pashınıan Ázerbaıjanmen beıbit kelisimge qol qoıýǵa daıyn ekenin málimdegenin jazǵan edik.