Áıgili rejısserdiń murajaıy ashyldy
ALMATY. 22 aqpan. QazAqparat - Bolashaqta rejısser bolǵysy kelgender Májıt Begalın sııaqty áıgili bolýǵa umtylý kerek. Bul týraly búgin Almatydaǵy №120 mektepte Májıt Begalın murajaıynyń ashylý rásiminde aıtyldy.
Murajaıǵa Qazaq KSR-niń Eńbek sińirgen óner qaıratkeri, «Eńbek Qyzyl Tý», «Qurmet belgisi» ordenderiniń jáne A.Dovjenko atyndaǵy kúmis medal ıegeriniń fotosýretteri men barlyq jumystary qoıylǵan. Álemniń túkpir-túkpirinen jınalǵan jádigerler arasynda áıgili kıno sańlaǵynyń tutynǵan zattary men kıimderi de bar.
Májıt Saparǵalıuly Begalın 1922 jyly 22 aqpanda Shyǵys Qazaqstan oblysy Abaı aýdany Degeleń aýylynda ómirge kelgen. 1978 jyly 5 mamyrda Almatyda 56 jasynda dúnıeden ozdy. Áıgili kıno rejısser, stsenarıst, akter M. Begalın kózi tiri bolǵanda búgin 90 jasqa tolar edi. Ataqty qazaq jazýshysy Saparǵalı Begalın men aktrısa Lıýdmıla Ivanovanyń otbasynda ómirge kelgen ol Ekinshi dúnıejúzilik soǵysqa qatysady. 1948 jyly Máskeýdegi Búkilodaqtyq kınematografııa ınstıtýtynyń rejısserlik fakýltetin bitirip, «Qazaqfılm» kınostýdııasynda jumys jasaıdy.
Onda óz zamandastary týraly «Bul shuǵylada bolǵan edi» (1955), «Jerge qaıta oralý» (1959), «Tulpardyń izi» (1964) kórkem fılmderin túsirdi. Sondaı-aq, 1957 Sh.Ýálıhanov týraly «Onyń kúni týady» (1957), B.Momyshuly jaıynda «Artymyzda Máskeý» dep atalatyn stsenarıılerdiń avtory. Eren eńbegimen 1967-1968 jyldary qazirgi Bishkek qalasynda ótken Ortalyq Azııa men Qazaqstan kıno óneri baıqaýynyń bas júldesi men 1-dárejeli dıplomyn ıelendi. M.Mámetova týraly «Mánshúk týraly balladasy» 1969-1970 jyldary Mınsk qalasynda ótken Búkilodaqtyq kınobáıgede KSRO Qorǵanys mınstrliginiń bas júldesimen marapattaldy.
