Avstrııa úsh kún aza tutady

ASTANA. KAZINFORM – Avstrııanyń Grats qalasyndaǵy mektepte bolǵan atys saldarynan mert bolǵandar sany 11 adamǵa jetti, dep habarlaıdy Kazinform agenttiginiń menshikti tilshisi.

Qaıǵyly oqıǵaǵa baılanysty Avstrııa kantsleri Krıstıan Shtoker úsh kúndik ulttyq aza tutý kúnin jarııalady. Bul kúni barlyq qoǵamdyq ǵımarattarda tý túsiriledi. Sársenbi kúni saǵat tańǵy 10:00-de jalpyulttyq bir mınýt únsizdik jarııalanady. Kóptegen is-sharalar ótkizilmeıtin boldy.

Federaldy úkimet sársenbige josparlaǵan májilisin Grats qalasy qurbandaryn eske ala otyryp, bir mınýt únsizdikpen bastaıdy. Sondaı-aq osy kúnge belgilengen sheshimderdiń bári kúshin joıady.

Federaldy prezıdent Aleksandr Van der Bellen bolǵan oqıǵany sýretteý múmkin emestigin jetkizdi. Vıtse-kantsler Andreas Babler (SPÖ partııasy) de búkil Avstrııanyń qaıǵyryp otyrǵanyn aıtty.

- Avstrııa qaıǵy ústinde jáne biz osy ýaqytta birge turmyz, osy aýyr qaıǵyny birge kóterý úshin. Biz qaıǵydan qan jutyp otyrǵandardyń janynda bolý úshin birge turmyz. Búgin bizdiń elimiz osyndaı qıyn-qystaý kúnde kúshimiz birlikte ekenin kórsetedi,- dedi prezıdent.

Syrtqy ister mınıstri Beate Maınl-Raızınger (NEOS) «FPÖ» men «Jasyldar» partııalarynyń kóshbasshysy retinde bul qaıǵynyń ózin kúıretip ketkenin aıtty.

Mekteptegi atys seısenbi kúni shamamen saǵat 10-dar kezinde bastaldy. Oqıǵa bolǵan jerde 9 adam óltirildi. Olardyń altaýy áıel, úsheýi er adam. Alaıda olardyń qanshasynyń bala, qanshasynyń eresek ekeni belgisiz bolyp otyr. Keshirek taǵy eki adam alǵan jaraqattarynyń aýyrlyǵynan kóz jumdy.

Bılik ókilderiniń habarlaýynsha, atysty buryn osy mektepte oqyǵan jergilikti turǵyn bastaǵan. Shabýyldan soń, ol dárethanaǵa baryp jasyrynyp, ózin óltirgen.