«Aýyl partııasy» Pavlodar óńirinde boldy

PAVLODAR. QazAqparat - «Aýyldan aýylǵa» úgit-nasıhat naýqany sheńberinde QR Parlamenti Májilisiniń, Pavlodar oblystyq jáne aýdandyq máslıhattaryna depýtattyqqa «Aýyl» partııasynan kandıdattar N.Arsıýtın, E.Toqtýshakov, B.Amanjolov, K. Shapýov, N. Júsipova, D. Qasenov, V.Polıakov, D. Nurseıitov, F. Lohasheva Sharbaqty aýdany Orlovka kentiniń turǵyndarymen kezdesti, dep habarlaıdy QazAqparat.

«Aýyldyqtardyń» kóshpeli tobyn partııadaǵy áriptesteri – fılıal tóraǵasy E.Baıqurmanov jáne qoldaý lıgasy shtabynyń basshysy A. Batyrshaev bastap bardy.

N.Arsıýtınniń aıtýynsha, «Orlovka» kentin úlgili aýyl retinde qabyldaýǵa bolady. Onda bıznestiń áleýmettik jaýapkershiligi esebinen aýyl turǵyndaryn tolǵandyratyn barlyq problemalar – sapaly aýyzsý, ınjenerlik jáne áleýmettik ınfraqurylym, tabys deńgeıi jáne ózge de máseleler sheshimin tapqan.

Óz sózinde kandıdat oblysta mundaı aýyldar óte az ekenin atap ótti. Kóp jaǵdaıda problemalyq aýyldar kezdesedi. «Aýyl» partııasy olardaǵy jaǵdaıdy únemi qadaǵalap otyrady.

Kezdesýden keıin «Aýyl» partııasynyń úgit-nasıhat toby «Orlovka» aýylynyń mańynda ornalasqan «Pobeda»JShS-ǵa bardy.

Kezdesý barysynda kásiporyn basshysy Vladımır Polıakov kásipkerlerdiń áleýmettik jaýapkershiligi aýyl ınfraqurylymyn damytýǵa yqpal etetinin atap ótti. Óz kezeginde, memleket aýyl sharýashylyǵy taýaryn óndirýshilerdiń problemalyq máselelerin sheshýde barynsha járdem kórsetýi tıis. Bul - uzaq jáne arzandatylǵan nesıeler berý, janar-jaǵar maı men jemshópti sýbsıdııalaý.

Óz kezeginde N.Arsıýtın «Pobeda» JShS basshysynyń sózine qoldaý bildirdi.