Aýyl ákimderi saılanatyn kúnder belgili boldy
Eske salaıyq, ákimder tıisti aýdandyq nemese qalalyq máslıhattardyń otyrystarynda saılanatyn bolady. Bul týraly búgin Ortalyq saılaý komıssııasynda ótken brıfıng barysynda málim boldy.
«Aýdandyq jáne qalalyq aýmaqtyq saılaý komıssııalarynyń sheshimderine sáıkes, ákimderdi saılaıtyn máslıhat otyrystary Ońtústik Qazaqstan oblysynda 5 tamyzda, Atyraý oblysynda 6 tamyzda, Aqtóbe, Almaty, Qostanaı, Qyzylorda, Mańǵystaý, Pavlodar jáne Soltústik Qazaqstan oblystarynda 7 tamyzda, Shyǵys Qazaqstan oblysynda 7 jáne 8 tamyzda, Batys Qazaqstan oblysynda 7 jáne 9 tamyzda, Aqmola jáne Qaraǵandy oblystarynda 8 tamyzda, Jambyl oblysynda 9 tamyzda ótetin bolady», - dedi OSK baspasóz hatshysy Venera Jeksembekova.
Eske sala keteıik, Qazaqstan boıynsha barlyǵy 2457 ákim saılanatyn bolady. Olardyń 47-si aýdandyq mańyzy bar qalalardyń ákimderi, 2101-i aýyldyq okrýg ákimderi, 119-y kentter ákimderi jáne 190-y aýyl ákimderi. Ákimdikke kandıdattar usynýdy aýdannyń ákimi jergilikti qoǵamdastyqpen konsýltatsııalardan keıin balama negizde júzege asyrady. Al búginge deıin el óńirlerinde myńnan astam osyndaı kezdesýler uıymdastyrylyp, nátıjesinde qazirgi ýaqytta aýyl ákimdigine 895 kandıdat usynylǵan.
