Aýyldyq eldi mekenderde 74 sport ǵımaraty salynyp jatyr

ASTANA. KAZINFORM – Aýyldyq eldi mekenderde 74 sport ǵımaraty salynyp jatyr. Bul týraly Májilis depýtattarynyń saýalyna Premer-Mınıstrdiń orynbasary Qanat Bozymbaevtyń jaýabynda aıtylǵan.

«2024-2026 jyldarǵa arnalǵan respýblıkalyq bıýdjette «Aýyl – el besigi» baǵdarlamasy aıasynda óńirlerde jalpy somasy 83 173 mln teńgege 301 mádenıet jáne sport obektisin salýǵa jáne rekonstrýktsııalaýǵa shyǵystar (2024 jylǵa – 78 600 mln. teńge, 2025 jylǵa – 4 573 mln. teńge) kózdelgen. AMANAT partııasynyń saılaýaldy baǵdarlamasy aıasynda 2027 jylǵa deıin 1 245 mádenıet nysanyn (220 qurylys, 1 025 jóndeý jumystary) salý jáne jóndeý jumystary júrgiziletin bolady», - dedi vıtse-premer jaýabynda.

Úkimet basshysy orynbasarynyń dereginshe, 2021 jyldan búginge deıin 926 nysan boıynsha jumystar oryndaldy. Bıyl 45 nysannyń qurylysy josparlanǵan.

«Sonymen qatar sporttyq ınfraqurylymdy damytý júıeli túrde júrgizilip keledi. AMANAT partııasynyń saılaýaldy baǵdarlamasynyń Jol kartasyna sáıkes, 2028 jylǵa deıin aýylda 100 jyldam salynatyn sport ǵımaratynyń qurylysy josparlanǵan. Bıyl 25 nysannyń qurylysy júrgizilip jatyr. Aýyldyq eldi mekenderde 2028 jylǵa deıin 271 nysan salý jáne jóndeý josparlanǵan. Onyń ishinde: jańa qurylys (rekonstrýktsııa) – 213, jóndeýge jatatyny (kúrdeli jáne aǵymdaǵy jóndeý) – 58. «Aýyl – el besigi» baǵdarlamasy aıasynda osy jyly 74 nysannyń qurylysy júrgizilýde», - dedi ol.

Buǵan deıin «Jaıly mektep» jobasy aıasynda jyl sońyna deıin 28 aýyldyq mektep paıdalanýǵa beriletindigin jazǵan edik.