Áýe kompanııalary merekelik kúnderge qosymsha reıster uıymdastyrady
ASTANA. KAZINFORM — Qazaqstan Respýblıkasy Kólik vıtse-mınıstri Talǵat Lastaevtyń tóraǵalyǵymen Air Astana, FlyArystan, SCAT, VietJet Qazaqstan áýe kompanııalarynyń, sondaı-aq Astana jáne Almaty qalalary áýejaılary basshylyǵynyń qatysýymen keńes ótti. Bul týraly Kólik mınıstrligi málim etti.
Keńes barysynda merekelik kúnderi áýejaılar men áýe kompanııalarynyń jumys rejımin kúsheıtý máseleleri qaraldy.
Merekelik kezeńde jolaýshylar suranysynyń artýyn qamtamasyz etý maqsatynda kelesi baǵyttar boıynsha 100 qosymsha reıs uıymdastyrý josparlanǵan: Astana — Almaty, Almaty — Oral, Almaty — Semeı, Astana — Túrkistan, Astana — Aqtóbe, Almaty — Aqtaý, Almaty — Aqtóbe jáne Astana — Shymkent.
Keńes qorytyndysy boıynsha Qazaqstannyń Avıatsııalyq ákimshiliginiń avıatsııalyq ınspektorlaryna merekelik kúnderi monıtorıngtik toptar quryp, jolaýshylardyń quqyqtaryn qorǵaý jáne reısterdiń ýaqtyly oryndalýyn qamtamasyz etý maqsatynda Astana jáne Almaty qalalaryndaǵy iri áýejaılarda bolý tapsyryldy.
Áýe kompanııalary men áýejaılarǵa:
— úzdiksiz jumysty qamtamasyz etý úshin áýe kemeleriniń rezervin jáne qosymsha jerústi tehnıkasyn qarastyrý;
— personal quramyn tájirıbeli mamandarmen kúsheıtip, reıster keshiktirilgen jaǵdaıda jolaýshylarǵa qyzmet kórsetý aıasynda ystyq tamaq pen sýsyndardyń berilýin qamtamasyz etý;
— reısterdiń keshigýi jaǵdaıynda jolaýshylardy resmı saıttar, áleýmettik jeliler, mobıldi qosymshalar, áýejaılardaǵy aqparattyq tablolar jáne buqaralyq aqparat quraldary arqyly jedel habardar etý.
Jolaýshylarǵa reısterdiń mártebesi men ushý ýaqytyn áýe kompanııalary men áýejaılardyń anyqtama qyzmetteri, sondaı-aq resmı saıttar men mobıldi qosymshalar arqyly aldyn ala naqtylaý usynylady.
— Áýe kompanııalary men áýejaılar qabyldap jatqan barlyq sharalar, eń aldymen, ushý qaýipsizdigin qamtamasyz etýge baǵyttalǵan. Osyǵan baılanysty obektıvti sebeptermen týyndaıtyn reısterdiń keshigýine túsinistikpen qaraýlaryńyzdy suraımyz, — delingen vedomstvo habarlmasynda.
Búgin sondaı-aq aýa raıyna baılanysty bes baǵyt boıynsha poıyzǵa qosymsha oryndar ashyldy.