Áýe kompanııalary Boeing ushaqtaryndaǵy otyn tetikterin teksere bastady
ASTANA. KAZINFORM – Álemniń túrli elderindegi áýe kompanııalary Air India áýeapatynan keıin Boeing ushaqtaryndaǵy otyn berýdi aýystyratyn tetikterdi teksere bastady. Bul týraly Reuters agentti habarlady.

Agenttiktiń málimetinshe, tekserýler avstralııalyq Qantas Airways, japondyq All Nippon Airways (ANA) jáne Japan Airlines (JAL), koreıalyq Korean Air jáne sıngapýrlyq Singapore Airlines kompanııalarynyń ushaqtarynda júrgiziledi.
2018 jyly AQSh-tyń Azamattyq avıatsııa federaldy basqarmasy (FAA) otyn berý tetiginiń tehnıkalyq standarttarǵa sáıkestigin tekserý boıynsha nusqaýlyq shyǵarǵan bolatyn.
Buǵan deıin Úndistannyń Azamattyq avıatsııa bas basqarmasy Boeing ushaqtaryndaǵy otyn aýystyryp-qosý tetikteriniń buǵattalý mehanızmin tekserýdi bastaǵanyn málimdedi.
Reuters dereginshe, Air India kompanııasy Boeing 787 ushaqtarynyń jartysyn jáne Boeing 737 ushaqtarynyń basym bóligin tekserip shyqqan. Qazirgi ýaqytta eshqandaı aqaý anyqtalmaǵan.
Aıta keteıik, Úndistanda ushaq apaty boıynsha aldyn ala esep jarııalandy.