Atyraýlyq ustazdar otbasy úshemdi boldy

ATYRAÝ. QazAqparat – Atyraýlyq ustazdar otbasy úshemdi boldy. Bul áýlette 54 jyl buryn da úshem ómirge kelgen. Buryn nárestelerdiń ákesiniń ájesi úshem bosanǵan, dep habarlaıdy QazAqparat tilshisi.

Náresteler 8 qarashada saǵat 23:00 shamasynda Atyraý qalalyq perzenthanasynda týǵan. Buǵan deıin bul otbasy 2021 jyly qyzdy bolǵan. Endi eki qyz, bir ulmen tolyǵyp otyr.

«Bizdiń áýlette úshem de, egiz de bolǵan. Atam Berishqalı júrgizýshi, ájem Nursulý munaı óńdeý zaýytynda aspaz bolyp jumys istegen. Ákem – otbasyndaǵy úlken bala. Ájem Nursulý tórt baladan soń, 54 jyl buryn úshemdi – eki ul, bir qyzdy bosanǵan. Úshemniń syńary bolǵan aǵaıymnyń biriniń qyzynda egiz bar. Endi mine, dál sondaı qýanyshqa biz de kenelip otyrmyz. Áıelim ekeýmiz 2020 jyly otbasyn qurǵan edik», - deıdi úshemniń ákesi Murat Sultanov.

Úshemniń salmaǵy da, boıy da ártúrli. Eki qyzdyń salmaǵy – 1 750, 1 630 g, boıy – 43 jáne 45 sm. Al, uldyń salmaǵy – 1 960 g, boıy – 42 sm.

Murat Sultanovtyń aıtýynsha, óziniń de, áıeliniń de mamandyǵy – pedagog. Ózi Atyraý qalasyndaǵy №38 mektep-lıtseıinde alǵashqy áskerı daıyndyq páninen sabaq beredi. Al, áıeli Albına №33 mektepte dene shynyqtyrý pániniń muǵalimi bolyp jumys isteıdi.

Eske sala ketelik, budan buryn atyraýlyq Ahmad, Batyrhan, Ismaıl esimdi úshem perzenthanadan shyqqanyn jazǵan edik.