Atyraýlyq 8 jasar qyz álemniń sýpermodeli atandy

ATYRAÝ. QazAqparat – Atyraýlyq 8 jasar oqýshy qyz álemniń sýpermodeli atandy, dep habarlaıdy QazAqparat.

Qurmanǵazy aýdanynyń Kóptoǵaı aýylynda turatyn Márııam Ishanǵalıeva 3-synypta oqıdy. Bıylǵy shildede «Álemdik model – 2021» halyqaralyq baıqaýyna sýretterin joldaǵan eken. Al, qyrkúıekte baıqaý qorytyndysymen birinshi orynǵa ıe bolyp, aqtyq saıysqa joldama alǵan. Jaqynda sheshýshi saıys Sochıde qorytyndylandy.

Anasy Araı Qarabalaevanyń aıtýynsha, bıyl «Álemdik model» baıqaýyna álemniń 40

elinen úmitkerler qatysýy tıis bolǵan. Alaıda, koronavırýs pandemııasyna baılanysty 25 úmitker baq synaǵan. Qazylar alqasynyń jeti múshesi Márııamdy 6-9 jastaǵy qatysýshylardyń arasynan jeńimpaz dep tanydy. Atyraýlyq oqýshy baıqaýdyń bas júldesin ıelenip, «Álem juldyzy» atanyp otyr. Oǵan «Jer sharynyń sýpermodeli –2021» atalymy qosa berilgen.

«Qyzym jolǵa shyǵarda «Men basyma táj kıip kelemin» degende, tań qalǵan edim. Saıys

kezinde az-kem qobaljyǵany baıqaldy. Óıtkeni, halyqaralyq básekede elimizdiń atynan

jalǵyz ózi qatysty. Biz Qurmanǵazy aýdanynda turamyz. Sol sebepten, sahnaǵa Qurmanǵazynyń «Adaı» kúıimen shyqty. Baıqaýdyń tájin basyna kıgizgende qýanyshtan jylap jiberdi», - deıdi anasy Araı Qarabalaeva.

Segiz jasynda álemdik sýper model atanǵan Márııam Ishanǵalıeva bos ýaqytynda bı úıirmesine qatysyp júr. Buǵan deıin oblystyq, respýblıkalyq baıqaýlardyń jeńimpazy atanǵan. Armany – Ońtústik Koreıada joǵary bilim alyp, dáriger bolý.

Eske sala ketelik, budan buryn atyraýlyq balýan álem kýboginiń ıegeri atanǵanyn habarlaǵan bolatynbyz.