Atyraýlyq 40 sarbaz áskerge attandy
Atyraýlyq 40 sarbaz Taraz qalasyndaǵy qurlyq áskerine shuǵyl áskerı qyzmetke jiberildi. Atyraý oblysynyń ákimi Nurlan Noǵaev bolashaq jaýyngerler, olardyń týystary men jaqyndary aldynda sóz sóıledi.
«Búgin biz qazaqstandyq ásker qataryna jas jigitterimizdi Otan aldyndaǵy boryshyn atqarýǵa jiberemiz. Biraq, boryshtan bólek, áskerı qyzmet - sarbaz úshin eń jaqsy ómirlik mektep. Áskerdegi qyzmet - jetilý, minez, batyldyq úshin ómirlerińizdegi alǵashqy synaq. Búginde elimiz - álemdik keńistikte laıyqty orny bar memleket. Bul, álbette, Elbasymyz, Bas qolbasshy Nursultan Nazarbaevtyń ishki jáne syrtqy sarabdal saıasatynyń arqasy. Qazaqstandyq áskerde materıaldyq-tehnıkalyq baza, áleýmettik kómek turǵysynan barlyq jaǵdaı qarastyrylǵan. Bul bizdiń áskerge shekaramyzdy qorǵaýda alǵa qoıylǵan strategııalyq tapsyrmalardy oryndaýǵa múmkindik beredi. Jas sarbazdarǵa azamattyq boryshyn laıyqty túrde ótep, anttaryna adal bolýdy tileımin», dedi Nurlan Noǵaev. 
Oblys basshysy sonymen qatar, jaýyngerlerge áskerı qyzmet qıyndyǵyna moıymaı, abyroıly qyzmetten úılerine aman oralýdy amanat etti. Basty mindet - jas urpaq sanasynda óz eli men bolashaǵyna degen maqtanysh pen jaýapkershilik sezimin oıatý. Kóptegen jastar Otanǵa qyzmet etý - árbir er azamattyń boryshy ekenin túsinedi.
Atyraý oblystyq qorǵanys isteri departamentiniń basshysy, polkovnık Batyrhan Aqbalıevtyń aıtýynsha, búgingi jaýyngerlerdiń árqaısysy naǵyz sarbaz bolýǵa laıyqty.
«Áskerdegi qyzmet keshegi jasóspirimdi keleshek Otanyna adal er azamat etip tárbıeleıdi. Aq jol tileımiz», - dedi Batyrhan Aqbalaev.
Saltanatty shara kezinde Atyraý qalalyq ardagerler keńesiniń tóraǵasy Álipqalı Bekesh jáne sarbazdardyń týystary da óz tilekterin bildirdi.
Aıta keteıik, 10 qyrkúıekte Qazaqstanda sarbazdardy kúzgi Qarýly Kúshter qataryna shaqyrý bastalǵan bolatyn. Respýblıka boıynsha 1992-2000 jyly týǵan 17 myńnan asa azamatty ásker qataryna qabyldaý josparlanǵan. Atyraý oblysynan kúzgi maýsymǵa 826 sarbaz shaqyryldy. 215-i áskerı bólimderge ornalasýǵa jiberildi. Olardyń 175-i UQK Shekara qyzmetine, 40-y Qarýly Kúshter qataryna qabyldandy.
