Atyraýda respýblıkalyq aqyndar aıtysy ótti
Bıyl ulttyq mereke retinde atalyp ótetin meıramǵa oraılastyrylǵan «Egemendigim – eren eldigim» atty respýblıkalyq aıtysqa Shyǵys Qazaqstan, Batys Qazaqstan, Abaı, Pavlodar, Qostanaı, Qyzylorda, Jambyl, Aqtóbe, Atyraý oblystary men Astana qalasynan 16 aqyn qatysty.
«Atyraý óńirinde bastaý alǵan bul aıtystyń orny erekshe. Óıtkeni, bıyl 13 jyldan keıin ulttyq mereke retinde qaıta bekitilgen Respýblıka kúnine arnalyp otyr. Halyqtyń muń-muqtajy, kóptiń kókeıinde júrgen máselelerdi jyrlaıtyn, qazaqtyń ulttyq ónerin keńinen nasıhattap júrgen aıtyskerlerge sáttilik tileımin», - dedi oblys ákiminiń orynbasary Jasulan Bısembıev.
Aqyndar Respýblıka kúni, táýelsizdik, birlik taqyryptaryn arqaý etti. Munaıly Atyraýdyń ekologııasyn, jol máselesin talqyǵa saldy.
Qazylardyń sheshimimen alaman aıtystyń bas júldesi – 1,5 mln teńgeni qostanaılyq aqyn Aıbek Qalıev ıelendi. Al, 1 mln teńge júldesi bar birinshi oryn Serikbol Panaberdıevke (Atyraý oblysy) berildi.
Ekinshi orynǵa eki aqyn laıyq dep tanyldy. Olar – Nurbeıbit Nuǵymanov (Atyraý oblysy) pen Serik Qýanǵan (Shyǵys Qazaqstan oblysy). Aqyndar 700 myń teńgege ıe boldy.
Úshinshi orynnyń 500 myń teńgelik úsh júldesi Rústem Qaıyrtaıuly (Abaı oblysy), Syrymbek Sársenbaev (Atyraý oblysy) pen Batyrjan Kádirbaıǵa (Atyraý oblysy) buıyrdy. Al, Juldyz Qojabekova (Aqtóbe oblysy) men Jansaıa Mýsınanyń (Batys Qazaqstan oblysy) óneri arnaıy júlde – 400 myń teńgemen atalyp ótti.
Sondaı-aq, Ónerbek Dáýlekenov (Atyraý oblysy), Aspanbek Shuǵataev (Pavlodar oblysy), Alshynbek Muqanǵalıev (Atyraý oblysy), Nurbolat Nuǵmanov (Atyraý oblysy), Erjan Ámirov (Qyzylorda oblysy), Dıdar Abbas (Jambyl oblysy) men Oljas Otarǵa (Astana qalasy) yntalandyrý syılyǵy retinde 300 myń teńge berildi.
Eske sala ketelik, budan buryn Atyraýda stýdentterdiń «Biz janbasaq...» respýblıkalyq aıtysy ótkenin jazǵan edik.
