Atyraýda Otbasy kúni atalyp ótti

ATYRAÝ. QazAqparat - Atyraýda 15 mamyr - Otbasy kúnine oraı merekelik shara ótti. Oǵan oblys ákiminiń orynbasary Jasulan Bısembıev qatysyp, atyraýlyqtardy aıtýly merekemen quttyqtady, dep habarlaıdy QazAqparat oblys ákiminiń baspasóz qyzmetine silteme jasap.

- Bul merekeniń elimizde, álemde óziniń halyqaralyq statýsy bar. Bul merekeni toılaýdyń ózindik ereksheligi bar. Kóktemniń shýaqty kezinde otbasy kúni atalyp otyr. Qazaqta «Otan - otbasynan bastalady» degen sóz bar. Memlekettiń damýynda, qoǵamnyń qalyptasýynda urpaq tárbıesiniń mańyzy zor. Qalamyzda sońǵy ýaqytta otbasy bolyp demalatyn alańdardyń sany artyp keledi. Osyǵan oraı birneshe saıabaqty ashý josparda bar. Bul saıabaq keshki ýaqytta turǵyndardyń jıi bas qosatyn jerine aınaldy. Halyqtyń kóńilinen shyqqan soń osy alańdy «Otbasy» saıabaǵy dep ataýǵa sheshim qabyldadyq. Ashylyp jatqan saıabaǵymyz qutty bolsyn, - dedi Jasulan Bısembıev.

Shara aıasynda jarasymdy januıanyń negizin qalyptastyrýdaǵy orasan zor eńbegi úshin birqatar mereıli otbasy oblys ákiminiń Alǵys hatymen marapattaldy.

Sondaı-aq Avangard yqshamaýdany Nurǵısa Tilendıev kóshesindegi alańǵa «Otbasy saıabaǵy» ataýy berildi.

Keıin oblys ákiminiń orynbasary turǵyndarmen birge jańadan ashylǵan saıabaqqa tal ekti.