Atyraýda órtengen úıden 51 adam evakýatsııalandy
Oblystyq tótenshe jaǵdaılar departamenti qoǵammen baılanys tobynyń málimetinshe, órt búgin, 30 mamyrda tutanǵan. Bul týraly jergilikti ýaqytpen saǵat 10:35-te habar túsken.
«Atyraý qalasyndaǵy S. Datov kóshesinde ornalasqan 6 qabatty úıdiń balkonynan tútin shyqqan. Shaqyrtý ornyna sanaýly mınýtta jetken órt sóndirýshiler besinshi qabattaǵy páterde turmystyq zattardyń janǵanyn anyqtady. Departament qyzmetkerleriniń kúshimen 7 adam, onyń ishinde 5 bala avtosaty arqyly 5 jáne 6-qabattan qaýipsiz jerge shyǵaryldy. Turǵyn úı dálizindegi baspaldaq arqyly 44 adam, onyń ishinde 15 bala evakýatsııalandy», - dep habarlady departamenttiń qoǵammen baılanys toby.
Jalyn saldarynan 30 sharshy metr aýmaqta turmystyq zattar janǵan. Órt sóndirýshilerdiń jedel is-áreketiniń nátıjesinde 30 mınýt ishinde adamdar qutqarylyp, órttiń basqa páterlerge taralýyna jol berilmedi.
Órttiń shyǵý sebepteri anyqtalyp jatyr. Zardap shekkender joq. Jalyndy sóndirýge Atyraý oblysy tótenshe jaǵdaılar departamentinen 12 qyzmetker men 3 tehnıka jumyldyryldy.
Eske sala ketelik, buǵan deıin Atyraýda 15 qabatty úıdiń dálizinen órt shyǵyp, turǵyndar evakýatsııalanǵanyn jazǵan bolatynbyz.
