Atyraýda 19 velosıped urlaǵan kúdikti ustaldy

ATYRAÝ. QazAqparat – Atyraýda 19 velosıped urlaǵan 29 jastaǵy kúdikti ustaldy. Qazir kúdiktige qatysty qylmystyq is qozǵaldy, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, kúdikti birneshe velosıpedti urlap kelgen.

Ustalǵan kúdiktiniń jasy – 29-da. Ol urlyqty tek Atyraý qalasynda emes, oblystyń birneshe aýdanynda da jasaǵany anyqtalyp otyr.

«Osy kezge deıin kúdikti jeke turǵyn úılerdiń aldynda, kópqabatty úılerdiń kireberis dálizinde turǵan 19 velosıpedti qoldy qylǵan. Onyń qylmystyq áreketin Atyraý qalalyq polıtsııa basqarmasyna qarasty krımınaldyq polıtsııa bóliminiń qyzmetkerleri áshkereledi. Máselen, 25 shilde kúni saǵat 23:30 shamasynda kúdikti Atyraý qalasyndaǵy «Nursaıa» shaǵyn aýdanynda turǵan velosıpedti jasyryn jymqyryp, oqıǵa ornynan boı tasalaǵan. Jedel izdestirý sharalary nátıjesinde kúdikti «Vokzal mańy» shaǵyn aýdanynan ustaldy», - dep habarlady departamenttiń baspasóz qyzmetinen.

Qazir atalǵan urlyq deregine baılanysty kúdiktige qatysty QR Qylmystyq kodeksi 188-babynyń 3-bóligimen sotqa deıingi tergep-tekserý amaldary bastaldy. Tergeýdi Atyraý qalalyq polıtsııa basqarmasynyń qyzmetkerleri júrgizip jatyr.

Ózge aqparat qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, buǵan deıin Atyraýda urlyq jasaǵan destrýktıvti dinı aǵym ókili 4 jylǵa sottalǵanyn habarlaǵan bolatynbyz.