Atyraýdaǵy mektepte alǵash ret «Jas qutqarýshy» synyby ashyldy

ATYRAÝ. KAZINFORM — Atyraýda mektep oqýshylaryn 8-synyp oqýshylaryn qutqarýshy kásibiniń qyr-syryna oqytý bastaldy. Qutqarýshy formasyn kıgen oqýshylar ant berip, arnaıy kýálik aldy.

Atyraý qalalyq tótenshe jaǵdaılar basqarmasynyń bastyǵy Ǵabıt Babaevtyń aıtýynsha, «Jas qutqarýshy» synyby — oqýshylardy qutqarýshy kásibine baýlýdaǵy alǵashqy qadam. Munaıly shahardaǵy Q.Qaısenov atyndaǵy №33 orta mektepte ashylǵan synyp arnaıy jabdyqtalǵan.

«Óńirdegi alǵash synyptyń Ekinshi dúnıejúzilik soǵystyń erjúrek batyry, áıgili partızan, qazaqtyń qaıtalanbas dańqty perzenti Qasym Qaısenov atyndaǵy mektepte ashylǵany kóńil qýantyp otyr. «Jas qutqarýshy» synybyn ashýdyń birneshe maqsaty bar. Birinshiden, oqýshylardyń qutqarýshy mamandyǵyna yntasyn oıatý. Ekinshiden, qutqarý isiniń negizderin, tótenshe jaǵdaılardy joıý men zardap shekkenderge alǵashqy kómek kórsetýdiń daǵdylary oqytylady. Úshinshiden, oqýshylar arasynda salamatty jáne qaýipsiz ómir salty nasıhattalady»,- deıdi Ǵabıt Babaev.

Tótenshelikter «Alǵashqy kómek kórsetý» boıynsha alǵashqy sabaqty ótkizdi. «Jas qutqarýshy» synybynyń oqýshysy Ernar Smadııar bolashaǵyn atalǵan salamen baılanystyrýdy kózdegen.

«Tótenshe jaǵdaılar salasynyń formasyn kıip, «Jas qutqarýshy» kýáligin aldym. Osy mamandyqty tańdaýǵa kóńilim aýyp otyr. Úzdik oqımyn, boks sektsııasyna qatysamyn. Adamzatty tilsiz jaýdan qutqaratyn, bilikti maman bolsam degen maqsatym bar»,- deıdi «Jas qutqarýshy» Ernar Smadııar.

Atyraý qalalyq tótenshe jaǵdaılar basqarmasynyń bastyǵy Ǵabıt Babaevtyń aıtýyna qaraǵanda, «Jas qutqarýshy» synybynyń oqýshylaryna túrli ekskýrsııa uıymdastyrylady. Sondaı-aq, arnaıy sabaqtar ótkizý josparlanǵan.

Eske sala ketelik, budan buryn Atyraý oblysynda 3 kúnde qar qursaýynan 15 adam qutqarylǵanyn habarlaǵan edik.