Atyraýda eki aıda 8 keliden astam esirtki tárkilendi
ATYRAÝ. KAZINFORM — Atyraý oblysynda jyl basynan beri zańsyz aınalymnan 8 keli 446 gramm esirtki tárkilendi. Onyń 6,4 kelisi — marıhýana, qalǵany sıntetıkalyq esirtkiler.
Oblystyq polıtsııa departamentiniń málimetinshe, tárkilengen sıntetıkalyq zattardyń qatarynda alfa-PVP men mefedron bar. Sondaı-aq messendjerler, ınternet platformalar jáne elektrondy ári krıptovalıýtalyq tólem júıeleri arqyly jumys istegen esirtki dúkeni anyqtalǵan. Atalǵan onlaın dúken arqyly esirtki satýmen aınalysqan 8 adam ustaldy. Polıtsııa olardyń uıymdasqan qylmystyq top ekenin anyqtady.
Jalpy jyl basynan beri óńirde esirtkige qatysty 28 quqyq buzýshylyq tirkeldi. Onyń ishinde 18-i qylmys.
Atyraý oblysy polıtsııa departamenti bastyǵynyń birinshi orynbasary Quttybaı Sadyqovtyń aıtýynsha, qala turǵynynyń úıinde qarasora ósirýge arnalǵan zerthana bar ekeni belgili boldy.
— Úı jaǵdaıynda qarasora ósirý úshin zerthana uıymdastyrǵan qala turǵyny anyqtaldy. Odan 64 túp qarasora tárkilendi. Atalǵan derek boıynsha QR Qylmystyq kodeksiniń 300-baby 1-bóligimen qylmystyq is qozǵalyp, tergeý júrgizilip jatyr, — dedi Quttybaı Sadyqov.
Sonymen qatar QR Ákimshilik quqyq buzýshylyq týraly kodeksiniń 440-baby 1-bóligi, 103 jáne 608-baptary boıynsha 10 derek anyqtalǵan.
Budan bólek, «Antıfrod» aqparattyq júıesi arqyly 290 qazaqstandyq jáne sheteldik shot buǵattalǵan. Esirtki saıttaryn jarnamalaıtyn graffıtı jazbalardy joıý jáne aqparattyq broshıýra taratý boıynsha 10 aktsııa men reıdtik is-shara uıymdastyrylyp, 40-qa jýyq jazý óshirilgen.
Osyǵan deıin Qostanaı oblysynda er adamnan 200 keliden astam esirtki tárkilengeni týraly habarlaǵan edik.