Atyraýda áskerı qyzmetshi qaza tapty

ATYRAÝ.KAZINFORM — Búgin Atyraý garnızonyndaǵy áskerı bólimderdiń birinde josparly dalalyq atys jattyǵýlary kezinde merzimdi áskerı qyzmetshi oq jaraqatyn alǵan. Áskerı oblystyq aýrýhanada kóz jumdy.

Aldyn ala derekter boıynsha, oqıǵa qarýdy paıdalaný kezinde jiberilgen abaısyzdyq saldarynan bolǵan.

— Áskerı qyzmetshi dereý medıtsınalyq mekemege jetkizilip, oǵan qajetti medıtsınalyq kómek kórsetildi. Dárigerlerdiń barlyq kúsh-jigerine qaramastan, onyń ómirin saqtap qalý múmkin bolmady. Qazaqstan Respýblıkasy Qarýly Kúshteriniń qolbasshylyǵy qaza tapqan áskerı qyzmetshiniń týǵan-týystary men jaqyndaryna qaıǵyryp kóńil aıtady. Onyń otbasyna qoldanystaǵy zańnamaǵa sáıkes barlyq qajetti kómek pen qoldaý kórsetiledi, — dep málimdedń Atyraý garnızonynyń baspasóz qyzmeti.

Atalǵan fakti boıynsha Іshki ister mınıstrliginiń Áskerı-tergeý basqarmasy qylmystyq is qozǵady. Oqıǵanyń barlyq sebebi men mán-jaıdy anyqtaý úshin sotqa deıingi tergep-tekserý júrgizilýde.

Resmı málimetke súıensek, Qorǵanys mınıstriniń tapsyrmasy boıynsha oqıǵanyń barlyq mán-jaılaryn jan-jaqty ári obektıvti túrde tekserý úshin oqıǵa ornyna Qorǵanys mınıstriniń orynbasary basshylyǵymen arnaıy komıssııa jiberildi. Tergeý barysy QR Bas áskerı prokýratýrasynyń baqylaýyna alyndy.

Jýyqta Abaı oblysyndaǵy garnızonda áskerı qyzmetshi kóz jumǵanyn jazǵan edik.