Atyraýda 74 jastaǵy taksıst áje jol erejesin esh buzbaǵan
ASTANA. KAZINFORM — Atyraý oblysyndaǵy Maqat-Dossor tasjolynda jol erejesin múlde buzbaǵan tájirıbeli júrgizýshi bar. Bul týraly Polisia.kz jazdy.
Ol — 74 jastaǵy zeınetker Sáýle Musaeva. 30 jyldan astam ýaqyt boıy kólik tizgindep, onyń 22 jylyn taksı qyzmetine arnaǵan. Ol jyldamdyqty asyrmaý, jaıaý júrginshilerge jol berý, kólik aıdap kele jatyp telefonǵa alańdamaý sııaqty qaǵıdalardy qatań ustanyp, kóligimen myńdaǵan shaqyrymdy júrip ótken.
— Kólik júrgizý — tek róldi ustap, gaz basý emes. Bul — úlken jaýapkershilik. Keıbir júrgizýshiler asyǵystyq tanytyp, erejeni elemeıdi. Biraq jolda ár sekýnd mańyzdy. Bir qatelik orny tolmas qaıǵyǵa ákelýi múmkin. Sondyqtan men árdaıym tártipti saqtaımyn jáne ózgelerge de osyny keńes etemin, — deıdi ol.
Sáýle Musaeva Almaty tehnıkalyq ınstıtýtyn bitirip, ınjener-tehnolog mamandyǵyn alǵan. Ol eńbek jolynda ınjener, ekonomıst, fabrıka dırektory qyzmetterin atqaryp, zeınetke shyqqan. Al kólik júrgizýge degen qyzyǵýshylyǵy bala kezinen bastalǵan.
Alǵashqy kóligin — 1998 jyly satyp alyp, sodan beri birneshe kólik aýystyrǵanyn aıtady. Zeınetke shyqqannan keıin Sáýle Musaeva Maqat aýdanyndaǵy kólik júrgizý mektebinde sabaq bergen.
— Joldaǵy qaýipsizdik — árbir júrgizýshiniń jaýapkershiligi. Biz jol erejesin saqtaý arqyly ózimizdi ǵana emes, ózgelerdi de qorǵaımyz. Polıtsııa qyzmetkerleri árdaıym tártipke shaqyrady, óıtkeni bir sáttik beıqamdyq orny tolmas ókinishke ákelýi múmkin. Jolda abaı bolý — ózińdi jáne jaqyndaryńdy qorǵaý qaǵıdasy ár júrgizýshiniń sanasynda bolýy kerek, — deıdi Sáýle Musaeva.
Maqat aýdandyq polıtsııa bólimi de taksıst ájeıdi jaqsy tanıdy eken.
— Sáýle Musaeva — aýdanymyzdyń úlgili júrgizýshileriniń biri. Ony jergilikti turǵyndar jaqsy tanıdy, uqyptylyǵy men sabyrly minezin joǵary baǵalaıdy. Ol birde-bir ret jol erejesin buzǵan emes. Mundaı tájirıbeli júrgizýshiler jas býynǵa úlgi bolýy tıis. Biz kóktem merekesi qarsańynda Sáýle apamyzdy quttyqtap, oǵan alǵysymyzdy bildirýdi jón kórdik, — deıdi Maqat aýdandyq polıtsııa bólimi jergilikti polıtsııa qyzmeti basqarmasynyń ýchaskelik polıtsııa ınspektory Saıfolla Kapanov.
Polıtseıler 74 jastaǵy taksı júrgizýshisine gúl shoqtary men estelik syılyq tabystap, jolda júretin barlyq azamattardy saqtyqqa shaqyrdy. Búgingi keıipkerimiz Sáýle Musaeva — joldaǵy tártip pen jaýapkershilikti berik ustanǵan jan. Onyń tájirıbesi — barlyq júrgizýshige úlgi.
Eske sala keteıik, buǵan deıin Aqtaýlyq taksıst jolaýshylaryna án aıtyp beretinin jazǵan bolatynbyz.