Atyraýda 1500 jas áskerge shaqyrtýdy elemegen

ATYRAÝ.KAZINFORM – Byltyr Atyraý oblysynda 1500 turǵyn áskerge shaqyrtýǵa ýaqytynda kelmegen. Bul týraly Atyraý oblysynyń qorǵanys isteri jónindegi departament qyzmetkerleri aıtty.

Olardyń sózinshe, áskerı esepte turǵan azamattar kóbine SMS-habarlamany jáne Elektrondy úkimet portaly arqyly joldanatyn shaqyrtýǵa beıjaı qaraıdy. ıAǵnı, ýaqytynda kelmeı júrip qalady. Zańdylyq boıynsha azamat habarlama alǵannan keıin úsh kún ishinde jergilikti bólimshege kelýge mindetti. Shaqyrtýǵa nemketti qaraǵandardy jınaqtaýǵa polıtsııa qyzmetkerleri kómektesken. Nátıjesinde, ótken jyly óńirdiń 1400 turǵyny ásker qataryna qabyldanǵan.

Áskerden jaltarý faktisi tirkelmedi. Otan aldyndaǵy boryshty ótemeımin dep aıyppul arqalap, jaýapkershilikke tartylǵandar bolmaǵan.

Atyraý oblysynyń qorǵanys isteri jónindegi departamentindegilerdiń aıtýynsha, er azamattar kóbine meken-jaıy, jumysy syndy mańyzdy aqparatty jańartpaıdy.

- Áskerge shaqyrtý alǵan azamattar kóbine ýaqytyly eGov-taǵy jeke kabıneti arqyly mártebesin jańartyp otyrý kerek. ıAǵnı, shaqyrtý alǵan turǵyn joǵary oqý ornynda bilim alyp jatsa ony rastaıtyn qujatty bazaǵa engizý kerek. Jergilikti áskerı basqarý organdaryn habardar etý mańyzdy. 3 kún ishinde oǵan áskerden qaldyrý mártebesi engiziledi, - dedi Atyraý oblysynyń qorǵanys isteri jónindegi departament bastyǵynyń orynbasary Jasulan Satybaldıev.

Bul rette departament qyzmetkerleri kez kelgen jannyń áskerge barmaýǵa naqty sebebi bolsa, ony áskerden qaldyrý týraly mártebesin bekitý qajet ekenin aıtady. Áskerden keıinge qaldyrý mártebesi otbasylyq, densaýlyq jaǵdaıyna baılanysty rásimdeledi.

Sondaı-aq tergeýde bolǵan jaǵdaıda azamat áskerge alynbaıdy.

Aıta keteıik, bıyl kóktemgi shaqyrý naýqanynda Atyraýdan 800-ge jýyq jas áskerge barady. Qazir zerdeleý jumysy júrip jatyr.

Osyǵan deıin áskerı qyzmetshiler drondardy qurastyrý men basqarýdy úırenip jatqany jóninde jazǵan edik.