Atyraý oblysy kóktemgi tasqynǵa qalaı daıyndalyp jatyr
ATYRAÝ. KAZINFORM — Atyraý oblysy Jylyoı aýdanynda kóktemgi tasqynǵa qarsy daıyndyq júrip jatyr. Aýdan boıynsha Jem ózeniniń sý basý aımaǵyna Turǵyzba men Shoqpartoǵaı aýyly jáne Qursaı ózeginiń eki janynda ornalasqan Qulsary qalasy kiredi.
Aýdan ákimdigi bergen resmı aqparatqa súıensek, oblystyq qurylys basqarmasynyń tapsyrysymen Jem ózeni men Qursaı ózegin tereńdetý jumysy júrdi. Túp tereńdetý jumysy 95,3 shaqyrymda atqaryldy. Jalpy Jylyoı boıynsha 68,6 shaqyrym bógetti nyǵaıtý jumysy josparlanǵan. Búginde bul jumys ta tolyq aıaqtalýǵa jaqyn. Sonymen qatar, qazir 3 gıdrotehnıkalyq nysan salynyp jatyr.
— Jem ózeniniń boıynan, naqtyraq aıtqanda Baqashy eldi mekeniniń tusynda arnaıy shlıýz salynyp jatyr. Odan keıin Qursaı ózegi boıymen Qaraǵaı eldi mekeniniń tusynan salynyp jatqan sý ótkizgish nysan arqyly rettelmek. Budan soń kanal boıyndaǵy sý Qulsarynyń ishimen ótip, Qamyskólge quıady. Ol tolǵan jaǵdaıda Qur Jemge Sarqyraýyq dep atalatyn aýmaqta qurylysy júrip jatqan sý ótkizgish nysan arqyly jiberiledi. Qurylys jumystaryn naýryz aıynyń ortasyna deıin aıaqtaý josparlanyp otyr. Atalǵan gıdrotehnıkalyq qurylystar sý kólemine baılanysty qolmen rettelip otyrady, — dep málimdedi aýdan ákimdigi.
Jergilikti atqarýshy organnyń málimetinshe, búginde aýdan aýmaǵynda tótenshe jaǵdaı bolǵan jaǵdaıda 3 palatka, 10 aǵash úı, 2 órt sóndirý mashınasy, 30 motopompa, 20 generator jáne 3 elektrogenerator, 200 órt dabyly datchıgi, 250 jınamaly tósek, , 10 úrmeli qaıyq, 23 ratsııa, 9 týra telefon, 2 rýpor, 1 tirkeme, 3 machta, 1000 kúrek, 1000 jup qolǵap, 250 bas kıimge taǵylatyn fonar, 20 qol fonary, 400 myń qapshyq jáne tonnaǵa arnalǵan 1000 qapshyq daıyn.
Sonymen qatar, aýdandyq tótenshe jaǵdaılar bólimin materıaldyq resýrstarmen qamtamasyz etý maqsatynda qosymsha túrde 1 motorly qaıyq, 1 úrmeli qaıyq, 3 motor maıy jáne 10 tynys alý apparaty berildi.
Osyǵan deıin Jylyoı aýdanynda sý qoımasyn salý máselesi jóninde jazǵan edik.
Sondaı-aq elimizde 69 gıdrotehnıkalyq nysan jóndelip jatqanyn habarladyq.