Atyraý qalasy eki aýdanǵa bólinýi múmkin

ATYRAÝ.KAZINFORM — Jergilikti bılik Atyraý qalasyn eki ákimshilik aýdanǵa bólý máselesin qarastyrýda. Bul týraly Atyraý oblysy ákiminiń orynbasary Qaırat Nurtaev aıtty. 

Mundaı ózgeris qalanyń jańartylyp jatqan bas josparyna sáıkes enýi múmkin. Qaırat Nurtaevtyń aıtýynsha, bul bastama qalanyń jyldan jylǵa úlkeıýine baılanysty qolǵa alynǵan. Resmı statıstıkaǵa súıensek, búginde oblys ortalyǵynda 391 myńnan asa adam turady.

— Qazirgi ýaqytta oblys ortalyǵynyń bas josparyna ózgeris engizip jatyrmyz. 2040 jylǵa deıin qalanyń damý baǵyty osy qujatta kórsetilmek. Bas josparǵa sáıkes qazir qalanyń aýmaǵy 45 myń gektar, jańa josparǵa sáıkes qala aýmaǵy 57 myń gektarǵa deıin ósedi degen maqsat bar. Qalany Jaıyqtyń oń jáne sol jaǵy dep, eki aýdanǵa bólý máselesi qaralyp jatyr. Qalany eki aýdanǵa bólip, Astana, Almaty sııaqty qalalaryndaǵydaı jasaý josparda bar, — dedi Qaırat Nurtaev.

Oblys ákimi orynbasarynyń sózinshe, qalalyq ákimdikke barlyq aýmaqty qamtý — aýyr.

Sondyqtan mundaı usynys qarastyrylyp jatyr.

Aldaǵy ýaqytta Erkinqala men Damby aýylyn qosatyn avtomobıl kópirin, H.Dosmuhamedov atyndaǵy Atyraý ýnıversıtetiniń tusynan Jaıyq ózenin kesip ótýge múmkindik beretin jaıaý júrginshiler kópirin salý máselesi de nazarda.

— Atyraýda sanıtarlyq, ekologııalyq qorǵaý obektileri bar. Buryn qalanyń syrty bolǵan jerler, qazir shahar aýmaǵynda. Qaısysyn kóshiremiz, qaısysyn qaldyramyz degen suraqtar bolyp jatyr. 2026 jyldyń sońyna deıin josparlaý jumysyn aıaqtap, memlekettik saraptamadan ótkizip, bekitemiz degen oı bar, — dedi Qaırat Nurtaev.

Kólik ınfraqurylymyn, turǵyn úı kommýnaldyq sharýashylyǵy, energetıka, qurylys syndy túrli sala boıynsha zerdeleý, aldaǵy ýaqytta istelý kerek jumystar jasaqtalyp, josparǵa engiziletin bolady.

Qujat daıyn bolǵannan keıin qala turǵyndaryna jospardy tanystyrý, usynys-pikirlerin tyńdaý boıynsha kezdesýler uıymdastyrylmaq. Jalpy bas jospar máslıhat jáne úkimet deńgeıinde bekitilýi tıis.

Aıta keteıik, Atyraý qalasynyń bas jospary sońǵy ret 2016 jyly jasalǵan.

Osyǵan deıin Taraz qalasy da bas josparǵa sáıkes eki aýdanǵa bólinip, olarǵa ataý berilgeni týraly jazǵan edik.