Astanalyq volonterler 30 lıtr qan tapsyrdy
Qaıyrymdylyq sharasyna astanalyq 70 volonter qatysty. Sonyń biri - Aıan Ermentaev. Erikti osymen besinshi jyl qatarynan donatsııaǵa qatysyp jatyr. Olardyń árqaısysy 450 ml qan tapsyrdy.
«Elordalyq jastar «Biz birgemiz» aktsııasy aıasynda toptasa otyryp, ardagerlerdiń, jalǵyz basty analar men zeınetkerlerdiń aýlasyn qardan tazalaýdan bólek, turaqty turde donor retinde qan tapsyrý sharasyna qatysady. Bir donor - bir ómir demekshi, bizdiń ıgi isimiz kóptegen adamdardyń ómirin qutqarýǵa septigin tıgizedi dep oılaımyn. Osy kómektiń arqasynda biz bireýdiń anasynyń, ákesiniń, balasy men baýyrynyń ómirin saqtap qalamyz. Biz osy áreketimizben azamattardy qan tapsyryp, kómek kórsetýge shaqyramyz. Ár adam osyndaı qıyn jaǵdaıǵa tap bolýy múmkin», - deıdi ol.
Aıta keteıik, qys bastalǵannan beri volonterler ardagerlerge, zeınetkerler men jalǵyzbasty analarǵa aýlalaryn tazartýǵa qoldaý kórsetip keledi. Alǵys aıtý kúnine oraı «Ardagerlerge myń alǵys» jobasy aıasynda ardagerlerge azyq-túlik sebetterin taratýda.
Transfýzıologııa ǵylymı-óndiristik ortalyǵynyń dárigeri Aıdos Kenjınniń aıtýynsha, ortalyqqa kúnine 100-ge jýyq adam qan tapsyrýǵa keledi.
«Bizdiń ortalyqqa kúnine 100-ge jýyq adam donor retinde qan tapsyrady. Sońǵy eki jylda donatsııaǵa qatysýshy adamdar sany kóbeıdi. Atap aıtsaq, 2018 jyly 34 myńǵa jýyq, al 2019 jyly 35 myńǵa jýyq adam qan tapsyrdy. Medıtsınalyq tekseristen ótken adamnan standart boıynsha 450 ml qan 10-12 mınýtta alynady. Sodan keıin qan quramy zerthanalyq tekseristen ótip, karantınge jiberiledi. Biraq bir aıdan keıin donor múmkindiginshe qaıta kelip qan tapsyryp ketkeni durys», - deıdi ortalyq dárigeri.
Aıta ketsek, aktsııaǵa qosylǵysy keletin turǵyndar qan tapsyrar aldynda ishimdik, shylymnan bas tartyp, medıtsınalyq dárilerdi qabyldamaǵany jón. Sondaı-aq donatsııa kúni jeńil tamaqtanýy qajet.