Astanalyq oqýshylar Microsoft kompanııasynan grant utyp aldy

ASTANA. QazAqparat - Respýblıkalyq fızıka-matematıka mektebiniń oqýshylary Arsen Qylyshbek pen Vladımır Borzenkov Microsoft for Startups kompanııasynan 550$ grant utyp aldy, dep habarlaıdy QazAqparat.

Oqýshylardyń aıtýynsha, olar jasandy ıntellekt negizinde startap-joba ázirlegen.

«Whoock - klıent úshin mátindik habarlamalarǵa negizdelgen qyzmet júıesin damyta alatyn veb-saıt generatory jáne redaktory. Ol zamanaýı dızaınmen tolyq veb-saıt jasaı alady. ıAǵnı, saıtty jasap, klıenttiń suranysyna saı oryndaý jasandy ıntellektpen baılanys arqyly júzege asady»,– deıdi oqýshylar.

Jobanyń maqsatty aýdıtorııasy – kompanııa týraly prototıp nemese jedel saıt jasaýdy qajet etetin endi bastalǵan bıznes jáne startaptar.

Qazir Whoock alǵashqy qyzmettik nusqasyn júzege asyryp jatyr.

Beta nusqa iske qosylǵan soń oqýshylar servıstik múmkindikti odan ári keńeıtýdi josparlap otyr.

Whoock-pen tolyqqandy veb-qosymsha ázirleıtin múmkindik bolady.

«Platforma orta eseppen bir jarym mınýt ishinde tolyqqandy saıt jasaıdy. Kelesi aptada iske qosýdy josparlap otyrmyz. Kez kelgen adam óz platformasyna tegin qol jetkize alady jáne ony qalaǵanynsha paıdalanady», — deıdi oqýshylar.

Jas startaperler Microsoft for Startups Founder Hub-tan ótkenine qýanyshty, Arsen men Vladımır utyp alǵan qarajatty óz jobasyn damytýǵa jumsamaqshy.