Astanalyqtar 2026 jyldy qalaı qarsy aldy
ASTANA. KAZINFORM — Astanalyqtar 2026 jyldy aýqymdy merekelik sharalarmen, qalanyń basty alańdaryndaǵy jarqyn baǵdarlamalarmen qarsy aldy. Tolassyz jaýǵan qarǵa qaramastan turǵyndar men qonaqtar kontsertter men otshashýdy tamashalap, jańa jylǵa kóterińki kóńil-kúımen qadam basty.
Eń aldymen QR Prezıdenti Qasym-Jomart Toqaevtyń saǵat 00:00-degi dástúrli quttyqtaýy elimizdiń barlyq aımaǵyndaǵy qoǵamdyq oryndarda ornatylǵan LED-ekrandarda kórsetildi. Bul halyqqa teleekrannan ǵana emes, adamdar kóp jınalatyn oryndarda da quttyqtaýdy kórýge jáne tyńdaýǵa múmkindik berdi.
Oǵan qosa, alǵash ret Jibek Joly radıosynan Prezıdenttiń jańajyldyq quttyqtaýy berildi. Osylaısha, Jańa jyldy jol ústinde qarsy alǵan qazaqstandyqtar Memleket basshysynyń quttyqtaýyn 101.4 FM jıiliginen tyńdaı aldy.
Sondaı-aq, Astananyń qos jaǵalaýynda — Botanıkalyq baq pen «Atyraý» kópirine irgeles aýmaqtarda jańajyldyq otshashý boldy. Merekelik otshashýǵa bıýdjet qarajaty bólingen joq, demeýshilik qarajat esebinen uıymdastyrylǵan. Jańbyr aralas qar men jelge qaramastan, otshashý tamashalaýǵa kelgen adamdar qarasy kóp boldy.
Bıyl sýyq kesh kelgenimen, Astana parkteri qysqy maýsymǵa saqadaı saı. Qala kósheleri bezendirilip, jańajyldyq jaryq ınstallıatsııalary ornatylǵan. Balalar men eresekterdiń qysqy demalysyn qyzyqty ári densaýlyqqa paıdaly etý úshin qalada 57 syrǵanaq pen muz aıdyny ashylǵan. Astananyń 6 aýdanyndaǵy 34-ten asa lokatsııada muzdan jasalǵan syrǵanaqtar, muz aıdyndary, túrli-tústi fotoaımaqtar men erekshe shaǵyn sáýlettik formalar ornatylǵan.
18 jeltoqsanda Astananyń túrli aýdandarynda 40-tan astam jańajyldyq shyrsha jaǵyldy. Merekelik shyrshalar Ortalyq saıabaqta, Ǵashyqtar parkinde, Botanıkalyq baqta, EKSPO aýmaǵynda, «Qazaq Eli» alańynda, Esil ózeniniń jaǵalaýynda, Aqbulaq boıynda, sondaı-aq «Han Shatyr», «Keruen City», «Azııa Park», «Saryarqa», «Green Mall» mańynda ornalasqan. Sondaı-aq, quraq kórpe stılinde jasalǵan ekologııalyq shyrsha 4 jyldan keıin qaıta ornatyldy.
Sonymen birge, 31 jeltoqsannan 1 qańtarǵa deıin Astananyń barlyq 6 aýdanynda jańajyldyq merekelik kontsertter ótti. Saǵat 21:00-de «Qazaq eli» monýmentiniń janyndaǵy alańda, «EXPO» aýmaǵynda, sondaı-aq qalalyq alańda shyǵarmashylyq ujymdar men qazaqstandyq estrada juldyzdarynyń qatysýymen jańajyldyq merekelik kontsertter ótti. Oǵan otandyq estrada juldyzdary — Zarına Omarova, Erkesh Hasen, Marjan Arapbaeva, Sáken Maıǵazıev, Qazybek Quraıysh, Serik Ibragımov, Jubanysh Jeksenuly, Aqbota Kerimbekova, «Melomen», «Báıterek» toptary qatysty.
Almaty aýdanynda «Jeruıyq» saıabaǵynda jáne «Jeleznodorojnyı» turǵyn alabynda, «Nura» aýdanynda «Jaǵalaý» skverinde jáne «Úrker» turǵyn alabynda, «Saraıshyq» aýdanynda, «Otaý» jáne «Promyshlennyı» turǵyn alaptarynda merekelik kontserttik baǵdarlamalar saǵat 12.00-de bastalǵan.
Al «Baıqońyr» aýdanyndaǵy «Atatúrik» saıabaǵynda jáne «Óndiris» turǵyn alabynda, «Esil» aýdanynda «Baǵystan» turǵyn alabynda jáne «Saryarqa» aýdanynda «Qorǵaljyn» saıabaǵynda saǵat 14.00-den bastap kúndizgi jańajyldyq baǵdarlama ótti.
Aıta keteıik, aýa raıyna baılanysty elordanyń kommýnaldyq qyzmetteri kúsheıtilgen jumys rejımine kóshti. Elorda turǵyndary men qonaqtarynyń qaýipsizdigin qamtamasyz etý maqsatynda otshashý kezinde «Atyraý» kópiri mańyndaǵy muzyna shyǵýǵa tyıym salyndy.